Shillong: U Chairman ka High Level Committee (HLC), u Prestone Tynsong da ong u wa ka sorkar jylla tip bha ko wa kammon u leh ya ka Them Iewmawlong, ymtoh ki bru wa na baar kiwa wan du chi kynta wow batai ya ka sorkar.
Yeini u Prestone da ong u neibhah wa boon ki seiñ Punjabi kiwa wan na baar jylla wow tuklar wei batai ya ka sorkar kammon u leh ya ki bru kiwa sah ha Them Iewmawlong.
Da ong u wa i wan yong ki ymtoh du deiwa yoo ya ki khubor hamasaya khlem tip won yei sakhiat, tangwa ka sorkar u leh ko yeiwa bha tam neibynta ki kharmator kiwa toh hok kiwa kreh ka Municipal wow kyrriah ya ki na katai ka thaw neibhah kamwa man katni ym man ko ka thaw kawa chngaaiñ la hei chait i khiah wei wow chong wow sah.
Da ong u wa daw phah sylli phah pait biang ya kani ka thaw heiyatoh wa i chngaaiñ hei chait i khiah neibhah kamwa man katni, ki bru kiwa sah ha Sweepers’ Colony da chna khalær hi-eh ki ya ki yung ki sem hadooh wa yoo paarsnieh khlem pyrkhat de yei chait i khiah, wei da ong u wa hajrong kani ka yurim leh haap kyrriah noh ya kin a Them Iewmawlong.
Hajrong i pyrchah ki kharmator deiwa khang ya ki yung heipor wa lai chim Census ka SMB, neiliang u Prestone da ong u wa ini wym man i iwa ym sñiaw yahaap neibhah wymtip neiyi i daw wa leh ki kamni tangwa da pynartatien won ko wa kini ki bru ye ki u man kiwa chong tooh hi-eh heini.
Discussion about this post