Ka Thma U Rangli Juki (TUR) da dawa ko na ka sorkar jylla wow pynkrehkaam syndon yei phah e yumut ka sorkar pyrdi lyngba ka Ministry of Consumer Affairs, Food & Public Distribution wow pynyoh khoo rachon khamtam ha kini ki por wa poor u khñiang COVID-19 heiwa da dooh laad wow kamai, heiwa ka chnat ka sorkar pyrdi da ban joor ko wa toh u saam tikna ya ki baam rachon cha kiwa dooh, kiwa mylla sngi kiwa da toh hok wow yoh ya i baam rachon katkam ka aiñ National Food Security Act (NFSA).
Ka sorkar bei da phah ko ya waroh ki sorkar jylla wow pynman yei lai thooh bniah wa kyrpang wei wow pynyoh ya ki card rachon cha waroh kiwa chong chnong kiwa dooh wa duk, kiwa mylla sngi, kiwa chong chnong ha ki thaw wa cha sor wa ha ki thaw wa palatsor kamjooh.
Ka TUR da ong ko wa kiwa mylla sngi wa kiwa chong chnong kiwa dooh wa kyrdooh kam kiwa chongdai madan, ki warep, kitu kiwa khlem yung wa kiwi toh u yoh ki smat ya ki card rachon wa ki baam rachon wa e lyngba ka NFSA.
Ka TUR da dawa wei kyntu joor ko ya ki bor sorkar wow leh smat wei leh kyrpang ya ini i kaam, lym kamtæ i yap thngan daw wan i ha ki chnong ka jylla.
Ka TUR da ban joor ko sa chisien wow dawa joor wa ka sorkar jylla u e yarap poisa ko cha waroh ki wakreh mylla sngi kiwa da chah ktah joor na i khangsbak. Wei nadooh wa sdang ini i e song poisa toh u man i iwa che wa khooid deiwa pynbna paidbah ya i pyrtuid kiwa thap pyrtuid wei deiwa pynbna lada yoh ki næ ym em khnang wa ki paidbah u ye ki wow booddien ya ini.
Ka TUR da ong ko wa u pteiñ ko wow phah chooh chooh ya ki ujor hajrong kitu ki wym pu em yoh ya ka song poisa kawa da kular ha u snem 2020.
Waroh kiwa chong chnong kiwa biang ki kot ki sla wa da thap pyrtuid toh u yoh ki yei kyrchaan wei yarap na ka sorkar, pynkut ka kyrwoh na ka TUR.
