U Lat ka jylla, u Phagu Chauhan hawa e yei klam “Governor’s Address” ynne ka sngi nyngkong ka dorbar mang tangka da ong u wa i chngaaiñ wa i yoh yada kiwa chong chnong toh iwa emkaam yow wanrah ya ka roi ka paar hapoh ka jylla wei ka jylla ha ki snem wa da lai toh kawa yoh yei chongsuk.
Da klam u leh yeiwa emkaam wow pynbait noh ya u pood yong ki 6 tylli ki thaw wa em i ya kajia pood hapyrdi ka Meghalaya wa Assam.
U Lat da pyntip u leh wa ka sorkar da thung ko da ka Judicial Commission of Inquiry heiyatoh wa iwa jia ha Mukroh wei daw pyntikna wa kiwa ha-yung kiwa khlaad u yoh ki yei hok.
Hajrong ini, u Lat da pyntip u wa yow yada ya kiwa em ha khappood, da dep pynbna ya 7 tylli ki Border Outpost.
Da khana u leh wa i yaklam yasuk ka sorkar waka Hynniewtrep National Liberation Council (HNLC) katkam ka riti synchaar ka ri da sdang i wei ka sorkar leh daw pyntikna ko wa daw pyndep smat yeini, wei da e khublei u ya ka sorkar India wa da e ko yei kyrchaan.
Heiyatoh wa i pynbait pood da ong u wa ka sorkar da kreh ko neibynta wow pynbait khaddooh ya u pood hapyrdi ka Meghalaya wa Assam deiwa khana wa da dep chong yalang boonsien wei da ye wow pynbait nyngkong ya 6 tylli na ki 12 tylli ki thaw wa ya kajia kitæ ka Tarabari, Gizang, Hahim, Boklapara, Khanapara-Pillangkata wa Ratacherra deiwa lai hiar ki Regional Committee wa khlieh da ki Montri sorkar yow pynman ya ki yalang paidbah wa kiwa chah ktah ha waroh ki 6 tylli ki thaw. Wei deiwa chim yeiwa da chem kini ki 3 tylli ki Regional Committee da soi ya ka MoU hapyrdi ka Meghalaya wa Assam deiwa emlang leh u Home Minister ka ri.
Da khana u leh wa ka sorkar daw pynbait ko sa ya 6 tylli ki thaw wa dang sah wa em i ya kajia pood yow pyntikna wa kiwa chong chnong yoh ki wow im dei suk.
Ha iwi won i liang da khana u wa ki kaam wa yatoh wa i pynkrehkaam ya ka aiñ da miat bha i heiwa ki pulit ka Meghalaya da pynpliah ki yei takit iwa da wanrah yeiwa ye u Charge Sheet cha 39.76% ha u 2022 hawa nujor ha u 2021 iwa 32.2%.
Chooh chooh da ong u wa ki pulit ka Meghalaya da kreh bha ki wow yaleh thma yei drug heiwa da yoh kem i drug wa chongdor T. 71 klur deilang waka poisa kawa T. 60 lak nadooh u snem 2022.
Da ong u wa ka sorkar leh u kreh ko neibynta wow pynkhlan ya ki pulit deiwa pynbiang yeiwa emkaam ki heiwa ha kini ki snem wa da lai, da pynbna ya 5 tylli ki Emergency Service Station, 9 tylli ki Police Outpost wa 5 tylli ki Police Station wa thymme.
