Shillong : Ka Meghalaya SSA Schools Association (MSSASA) da beiñ joor ko ya sorkar yei wym chimkhia ko ya i chah sikai ya kiwa sikai (Teacher Education) neibhah man i iwa kongsan bha yow ku lang leh ya iwa sikai wa yoh ki khynnah.
Ka Diploma in Elementary Education (D.El.Ed) programme toh kawa da booh kyrpang neibynta kiwa sikai ha ka kyrdan Lower Primary wa Upper Primary Schools yow pynbniah ya kiwa sikai wei da sdang ya ka da ka Ministry of Human Resource Development (MHRD), Govt. of India.
Yow poi ka sorkar cha ka thong wow pynyoh ya i puræ cha waroh ki khynnah lynba ka aiñ “Right of Children to Free and Compulsory Education Act 2009” wa pynkrehkaam nadooh 1 Naitung (April) 2010 da booh ya ki kyndon wa emkaam u pynku yei kyrdan kiwa sikai ha waroh ki liang katkam wa booh da ka National Council of Teachers Education (NCTE).
Hei yatoh wa ini ka sorkar Meghalaya da dep ko u phah ya 7822 ngut kiwa sikai yow pyndep ki ya ka D.El.Ed ha ka thaw puræ ka NIOS ha u snem 2013.
Katkam ka RTI wa yoh ka MSSASA na ka MHRD da jubab wa na ki 7822, ki 4385 ngut toh kiwa da pass ya ka D.El.Ed wei da dep e leh ya ka Certificate cha ki. Iwa sñiawphylla won toh wa hadien chisnem leh kini ki 4385 ngut ym pu em wa yoh Certificate.
Neiliang ka MSSASA da dep pynman ko leh ya kiwa boon ki yakhih hei yatoh wa ini tangwa neiliang ka sorkar dang chong kli kti bait ko wei ym jubab kamjooh leh ym pynbait ko ya ini kynrum kynram wa mih ha ini i pynbna result ka NIOS iwa da ktah hadooh ya ka tulop kiwa sikai neidaw wym yoh ya ka certificate ka tulop wa da pynku ka sorkar leh ym yoh de ki katkam ka hok yong ki.
Also Read: Da i kylleiñ myngor u pynman ka MSSASA yow pyrchah yei mynthi ka NIOS
Discussion about this post