U Symbood Montri Rangbah wa pait ya ka Kaam Pohyung (Police), u Prestone Tynsong da ong u wa i lai khyndang ka Hynniewtrep Youth Council (HYC) ya ki yung ha Lum Survey toh iwa da leh khlem da pyntip næ ya syllok.
Da ong u wa da leh ki yeini neidaw wa em ki yei rukom pyrkhat wa suk bha wow khyndang deiwa lai khloh lai noh, tangwa da pynkynmoo u wa em hi ka aiñ deiwa pynrap wa ka sorkar leh ym kwah ko wow e thaw rieh ya ki bru kiwa em ha katai ka thaw wei lada toh kiwa sah pyrchah ya ka aiñ, neiliang ka aiñ daw leh ko yeiwa emkaam.
Da ong u leh wa ini i leh ka HYC da tyngkheiñ ko leh ya ki kyndon neibhah i kaam wa yatoh wa itai i thaw da em ko hapoh ka High Court wei dang bichaar.
Neiliang u Montri da kyntu u ya waroh wym toh u chim ki ya ka aiñ ha kti neibhah hadien daw mih chooh chooh i eh. Da khana u leh wa ya katni dang lai chakhmat wow pynsakhiat kiwa neiwon kini ki bru wa sah ha Lum Survey lada toh ki nong India wei hadien itæ daw chim ya ka rai.
Neiliang kiwa yahkhmat ka HYC da dep ong ki wym tieñ ki yei chah pynngat mukotduma neibhah wa da chakri ki ya ka jaitbru.
Discussion about this post