Ka Jaiñtia Students’ Union lyngba u Jersom Shylla u President ka seiñ wa u General Secretary u Treiborlang R Suchen da kyrpaad joor ki na u DC ka West Jaiñtia Hills District wow pynyinsur ya ka Total Curfew hapoh Ri-loom Jaiñtia.
Ka seiñ da chem ko wa boon ki paidbah kiwa na palatsor da ood ki nei pynkrehkaam ya ka Curfew hapoh ki ar District deiwa e yumut cha ki bor District wa ka sorkar wa ymtoh wow pynkrehkaam da ka Curfew næ wow khang-sbak salonsar ya ki District neibhah wa rap nachwa da dep pynbna ko wa ym em de i khang-sbak lait noh du ya kiwa yoh COVID-19 ha yung, wa ki kyntoit ki dong (Containment Zone) kiwa rap boon kiwa chah ktah ha u khniang khlam tangwa katni won da man i mar dei kangtleiñ.
Ka seiñ da e yumut ko ya ka sorkar wow wan chim ya ki Test yong ki paidbah (Random Test) hapoh ki chnong wow tip bniah yei man i long hapoh ki chnong khnang wow ye u ong kawon ka chnong man ko kawa lait na ka khlam wei ki paidbah hapoh kitæ ki chnong ye ki wow pteiñ wow lai kreh khnang wow ye ki wow pyndap yeiwa emkaam ki khamtam kiwa khih mylla kiwa khih na kti ha ktien.
U Treiborlang R Suchen da ong u wa kamwa 98% ka West Jaiñtia Hills District wa East Jaiñtia Hill District dang haap ki ha ki chnong palatsor kamtæ da kyrpaad u ya ka sorkar wow chimkhia noh ha kini sngi wow pynyinsur noh ya ka Curfew wei wow leh da ka Random Testing ha ki chnong wow tip yei man i long yong ki khnang wa ki paidbah leh wow ye ki u im suk.
Heijooh i por da kyntu ya ki paidbah waroh wymtoh u kheiñstiñ ki ya kani ka khlam kawa wan ha ka wat wa ar deiwa bood ryntih ya ki kyndon wa da booh da ka sorkar lyngba ka chnat i chait i khiah.
