Ka thong ‘New India’ u man ko iwa sakhiat lyngba ka ‘New North East’: Rajnath Singh

Shillong: U Union Home Minister u Rajnath Singh da ong wa yow poi luti cha ka India wa thymme namo ka ‘New India’ emkaam wow pynku wei wow wanrah ya ka chongsuk chong saiñ ha ki jylla ka thaaiñ mihsngi wow khut kam ka ‘New North East’. Yeini da ong u ha ka sngi wa kut ka 67^th Plenary Session yong ka NEC ha Shillong ynne ka sngi, da ong u leh u montri rangbahdooh ka ri u Narendra Modi em u ka thong wow wanrah ya ka ‘New India’ ha u snem 2022 wei hapoh kani ka thong da em leh ka ‘New North East’.

U Rajnath da ong u wa hapoh ka ‘New North East’ daw biang ki sarok wei daw ku ka yoh ka kot ki paidbah wa ki laad yoh kaam ki khynroo khyllood yow lait ki u mih naka chnong ka thaw yong ki hadooh wow lai cha baar ri.

Da ong u leh waka NEC toh u sdang ko ya ki ITI ki Polytechnic ki wow yarap wow e yei sap cha ki khynroo khyllood yow suk ki u yoh kreh. Neibhah deiwa yoh kreh daw wiar i mih ki seiñ kieñ suloi heijooh i por da ong u wa lada em ka chongsuk chonsaiñ daw boon ki Company wow wan wow seiñ khih cheini.

Da klam u leh chaphang ka rep ka riang deiwa ong wa u Narendra Modi em u ka thong wow pynku ar chah ya i yoh lap ki warep ha u snem 2022. “Emkaam i leh wow thung ya ki jait jhoor wa syad dor wei ka tnat Railway ye ko u yarap wow kit ya kini ki mar kam ki soh “Kiwi” wa ki syntu hapoh ka Train wa smat u lai kawa em ya ki AC Wagons.”

Pynbna ka VPP ya ki kyrtong MDC ha ka JHADC wa KHADC

November 13, 2024

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Da e buit u leh wow pynim biang ya ka North Eastern Regional Agricultural Marketing Corporation Limited (NERAMAC) wow pynlai yaaw ya ki mar rep deiwa ya krehlang wa ki SHG yow pynkhlan yei pynmih ya ki mar rep kamjooh leh ya i yoh khih yoh kreh.

U Rajnath Singh da kular u leh wa ka sorkar pyrdi u yarap ko ya waroh ki jylla ka thaaiñ mihsngi wow pynbiang yei emkaam ki pulit yow pynbha chooh chooh ya ka chongsuk hapoh ki jylla.

Ha kini ki ar sngi ka 67th Plenary ka NEC da wan emlang u Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances & Pensions, Atomic Energy and Space, Dr. Jitendra Singh, uwa man leh kam u Vice-Chairman ka NEC, wei da emlang ki Lat ki jylla, ki montri rangbah ki jylla thaiñ mihsngi wa ki sahep sorkar ki 8 tylli ki jylla.