U President ka All India Trinamool Congress (AITC) namo ka TMC Meghalaya Unit, u Charles Pyngrope da ong u wa ki 12 ngut ki MLA wa da psiah cha ka seiñ daw pynyoo ki wa da kreh ki neibynta i bha i miat ki paidbah khamtam kiwa dooh wa duk.
Da ong u wa ym slem de daw bood ki yei rukom krehkaam ha West Bengal, neibhah hapoh kani ka jylla em ki Scheme wa kyrpang neibynta ki bru wa duna hei yoh i laa, ki kynthai wa yap kurim, neibynta kiwa im du nei bai baam tymmen wa kiwi kiwi.
Heiyatoh wa i jied ya ki kyrtong neibynta ka Election MLA ha u 2023, da ong u wa ka TMC ha ka jylla daw jied ko ya u bru wa chim ya ki phang wa yatoh wa ki paidbah ka jylla.
U Charles da ong u, “Wow yoh yei kyrchaan wa pura na ki paidbah ka jylla, ka Trinamool Congress daw haap elaad ko ya ki paidbah wow tip hajrong ki mat namo ki Policy kiwa man neibynta ka jylla”.
Da ong u leh wa da em ka luti wow lai chaphrang neibhah wa da em kiwa kyrchaan ya ki tangwa emkaam leh wow pynngait ya ki paidbah hajrong ka mynried kawa tyrchaaiñ yong ki.
Heijooh i por da pyntip u leh wa oo da yoh u yei pynche na ka Chairperson ka AITC, ka Mamata Banerjee, wa ki heh ka seiñ ym luchia ki ya iwon iwon i kaam wa yatoh wa ka jylla lada lai katkam ki kyndon wa da booh.
