Jowai : Hei yatoh wa i klam u Montri Rangbah ka jylla u Dr Mukul Sangma waka Sorkar Congress daw leh ki yeiwa emkaam kam ka bailutsan wei wow e kreh sorkar ya kiwa hayung hasem yong ki 2 ngut kiwa chah siatyap ha Mookhep wa ya kiwa mynsoo ka seiñ Jaiñtia National Council (JNC) lyngba u Chairman yong ka u Sambormi Lyngdoh da phah u ya kani ka khubor.
“Neiliang ka Jaiñtia National Council (JNC) da pynrem joor ko ya itai i klam u Dr. Mukul neibhah iyi da leh ka sorkar ha kini ki duna ar snem wa da dep, neibhah ym yoo tip iyi u leh ki, neibhah ki kyntien u Mukul toh kiwow tymmoh ait-miaw hieh yeiwa da jia” da ong ka JNC.
Chooh chooh ka seiñ da ong ko wa lada ka aiñ man ko kawa salonshar tæ neiyi i daw wym chah pynchitom kiwa emkti wow siat ya ki paidbah haka chnong Mookhep.
“Yoosar ka tnat pulit toh ka thaw rieh kiwa tynyap bru” da ong u Sambormi Lyngdoh wei da kyntu leh ya ka sorkar wow pynmih paidbah noh ya kawa da takit ki hei yatoh weini.
Heijooh i por ka JNC da pynsñiaw ko yei sñiawngooh ko ya ki MLA ka liang pyrchah wada chimkhia ki u rah ya kani ka phang ha Assembly.
Discussion about this post