Ka Tura Medical College & Hospital toh ka yong sorkar tangwa u pynlai da ki bru samen: Conrad

U Montri Rangbah ka jylla, u Conrad K Sangma da pyntip u wa em boon i eh i khoo hei pynkrehkaam ya ka Tura Medical College & Hospital neidaw wa duna ki Doctor wa ki bru wa biang kyrdan hapoh ka jylla.

Ha ka yalang wa da pynman ha Mendipathar ynnin ka sngi, da pynche u wa kani ka Tura Medical College & Hospital u man ko kam ka yong ka sorkar tangwa daw pynlai ka da ki bru samen.

“Kiwa boon ki Seat ha kani ka College daw man ki neibynta kiwa na Meghalaya, tangwa da em kajiak ki Seat wow e laad ya kiwa pynlai ya kani ka thaw yow yoh ki u pynmih poisa yow su tulop ya kiwa kreh tangwa u man hi ko kam ka yong ka sorkar,” da ong u Conrad.

Da ong u leh wa ym em i thmu wow e laad ya ki bru samen wow chimkti lut ki ya waroh ki kaam yong kani ka Tura Medical College and Hospital neibhah i thaw wa ka yung man ko ka yong sorkar.

Related posts

Khyrngiat u DC yei em 560 tylli ki kreh wa lait ha West Jaiñtia Hills District: HITO Jowai Circle

May 28, 2025

Pynhaap ka DMO ya ki chong Pnar chapoh ka West Karbi Anglong, lai paan pynche ka PSM

May 28, 2025

Chooh chooh da ong u wa yei pynlai ka kani ka Medical College u man ko thij deiwa bood ya ki kyndon ka Medical Council ka ri nadooh wow thung kreh tangwa neidaw wa duna ki Specialist ha ki Hospital ka sorkar wa kiwi kiwa kreh wa emkaam, da chem chitom leh hawa thung kreh neibynta ka Shillong Medical College, kamtæ ya ka Tura Medical College da rai wow pynman kam kawa da ya krhelang wa ki bru samen Public-Private Partnership (PPP) Model kiwa em kattu katni donhi i bor.

Heiyatoh wa ka Management Quota da pyntip u wa yei dor bai lai puræ daw pynbait da ka sorkar lyngba ka Fee Regulatory Committee katkam ka Meghalaya Private Medical Institutions Ordinance, 2024 katwa ya kiwa na Meghalaya u yoh ki da ka State Quota hi.

Kini kiwa pynlai ya kani ka thaw daw hap ki leh wow su ₹1 klur chi snem cha ka sorkar jylla kam ka bai pynemkaam ya kani ka College.

Ini i pynche u Conrad toh neidaw wa kiwa boon ki seiñ na Garo Hills da pyrchah ki yeini i thmu ka sorkar wow e kti u pynlai cha ki bru samen deiwa e daw wa da chna ya ka da ka poisa paidbah neibynta wow chkari ya ki paidbah khamtam ki wym ye u lai cha ki thaw sumaar wa syad, kamtæ da khuslai lada pynlai da ki bru samen.

Da ong ki wa ka sorkar da khut ko wow e kti 33 snem wow pynlai wei ye leh wow pteiñ sa 33 snem wei ini da man i kamwa e kti syndon wow mantre hadooh 66 snem.

Da ong ki leh wa katkam wa sñiawthooh ki wa hadooh 50% ki Seat u man ko hapoh ka Management Quota.