Ka wah Myntdu wa psa um ya ka sor Jowai, katkam ka bui (Report) wa da chim nongmuna da ka yung krehkaam u SDO (PHE) Electrical Sub-Division Rymbai haka 13-07-2021, na Oorkhla wa na ka Dam Mupiah da chem wa ka um ym chngaaiñ de ko ya ki paidbah wow pynemkaam ya ka neidaw wa da jngud ko palat pood.
Hadien wa mih kani ka bui neiliang ka seiñ “Khooid Yaka Wah Myntdu” da ujor ko cha u DC ka West Jaiñtia Hills wow em ka Joint Inspection ha ki tymbud kani ka wah, kamtæ ynne ka sngi hei hiar li pait li sylli ya kini ki thaw wa kynthup ya ka thaw pynlang um ha Mupiah wa da emlang u P. Synnah uwa man kam u E.E. ka chnat PHE (Electrical) Jowai Division, u E.E. ka Water Resources Jowai, u A.S. Mukhim ADC (MCS) WJH, u Waheh Chnong ka Khimusniang wa ki dkhot ka seiñ “Khooid Yaka Wah Myntdu” da chem ki wa da lang ktieh lang chyiap bha ha i bynta ka Dam ha Mupiah.
Neiliang u sahep P. Synnah da ong u wa i chah ktah ka wah jia i mar hiar u slap heiwa ka um slap da rong lut ko ya ki khyndaw ki chyiap wa mih na kiwon kiwon ki thaw wa em ki kreh, kam neiwa chna yung chna sem, chna sarok, tih moo tih chyiap wa kiwi kiwi.
Da ong u leh wa heipor slap boon kiwa Phone wa ujor cha oo hajrong i tngit ka um, wei neiliang yong oo won da jubab u wa ki toh kiwa pynkhooid katwa kiwa pyntngit toh kiwi tawon wei da khana u leh wa ha uni u snem mar ya sdang wan u slap da phah sangeh taan um chwa kamwa ar sngi, le sngi neibhah wa i man i long ka wah ymye de wow pynkhooid kamwa jooh wei hadien ini won kiwa kreh hap yaleh ki wow kreh wow pynpoi um cha ki paidbah da kawa khooid.
Heiytoh wa i lang ktieh ha katai ka Dam da ong u wa neiliang ka yung krehkaam yong oo katwa ye da yaleh ki wow pynkhooid ya ka khamtam hei tlang manda ran ka um.
Neiliang u Chairman ka “Khooid Yaka Wah Myntdu” u K.L. Pariat da kyrpaad joor u ya u DC wow chimkhia chwa ki bnai tlang khnang wa ka um wym sngat ko wei i dooh um leh ym jia i.
Kamjooh da kyrpaad leh ya ka JHADC wa u DC wow pynkrehkaam hok yaka hukum ka NGT itæ wow khang yei tih chyiap, i noh khyndaw harood ka Wah Myntdu, neibah lym sangeh i pynkai khyndaw, i tih chyiap, tih moo harood ka wah; ki paidbah wa chaniah um na ka PHE daw chem chitom ki.
