U Montri Rangbah ka jylla u Conrad Kongal Sangma da ong u wa i duna um ha Umiam da jan poi ko cha u pood wa hap khang noh yei pynmih bordiñ neidaw wa duna ware u slap ha ki bnai wa dadep, wei da ong u leh wa i dooh bordiñ ymtoh de du ha kani ka jylla, tangwa ha waroh kiwi ki jylla heiwa awjan waroh ki jylla ha ka ri chem ki yei jooh i eh i khor.
Da ong u wa ka sorkar ha ki ar snem wa dadep hap pynlut ko kamwa T. 600 klur nei yoh ka jylla wow pynbiang bordiñ, wa kynthup ha i thied ya ka bordiñ. Da ong u wow wanrah bordiñ kamwa man katni ka sorkar hap pynlut ko T.3 klur man-ka-sngi wow thied ya ka bordiñ, wei lada dang pteiñ i raw sa 100 sngi wow wan, ka sorkar hap ko wow pynlut chooh chooh sa kamwa T. 3 klur du wow thied bordiñ wow pynman kamwa man kattæ donhi.
Choh chooh da ong u wa i man i long man iwa kylleiñ bha wow pyntikna wa ym palat i pyndooh brdiñ bar yeiwa katni, deiwa pynrap wa ka sorkar pyrchang ko wow pynbiang la kammon kammon kamwa man kattæ chwa.
U Conrad da ong u wa emkaam wow pyrkhat deiwa yaar, wei ka Solar Mission toh kawi na ki laad wow yarap ya ka jylla, wei ini kyrmen u wow chimpor hadooh 2 wa 3 snem wow pynbiang bordiñ da ki bor ka sngi wei ka sorkar da pynkhreh ko leh ya ki Thermal Plant khamtam neibynta wow pynbiang bordiñ ha ka jylla.
Ha iwi i liang u Conrad da ong u wa ka chnat bordiñ wa ka MeECL chem chitom bha ko, khamtam wa ya i dor yong ka bordiñ da booh bait da ka Regulatory Commission ka India, heiwa i dor ya ki paidbah u man ko T. 6 chi Unit katwa ya ki karkhana i dor man i du T. 5 chi Unit, wot hawa ka sorkar da kyrpaad ko wa ymtoh wow phah su tam ya ki paidbah, wei ya ini hadooh katni ka sorkar dang yaklam ko wow pynbait.
