U Symbood Montri Rangbah ka jylla, u Prestone Tynsong da phah u yaka Voice of the People Party (VPP) wow puræ bniah ko yaka Meghalaya Lokayukta Act wei hadien itæ wow ujor næ pyrchah.
Ini i klam yong u Prestone toh hadien wa ka VPP da e por ko 24 kynta yaka sorkar jylla wow thung biang ya ki Officer kiwa da chah beh kreh dang ini wa dep haka sorkar wa kynthup ya 3 ngut ki Officer, kitæ u Director of Inquiry and Prosecution, u J. Rymmai, ki Inquiry cum Investigating Officer, u R. Pde wa u Anil K Sangma.
U Prestone da ong u wa neiliang ka Party NPP leh da pynche ko hajrong ka yurim wa da pyndam kreh ya kini ki 3 ngut, wei pynrap u deiwa ong, “E wa kiwa yahkhmat ka VPP u puræ chwa ki yaka aiñ yong ka Lokayukta wei hadien ujor won,” deiwa ong chooh chooh wym toh iwa bha wow pyrchah khlem da puræ chwa yaka aiñ.
Da ong u wa katkam ki kyndon, da kdaw che wa ki Officer ka Lokayukta toh u man ki kiwa dang kreh kattæ ymtoh da kiwa chong-ngiah.
Hawa yatoh won wa i dawa yong ka VPP wow pyndam noh yeiwa thung kaam Chairman wa Vice Chairman da ka sorkar, neiliang u Prestone da ong wa ye ki wow dawa, tangwa ka sorkar hawa leh ko ya iyi iyi da dep pyrkhat chwa chispah sien lada wow thung nei wow pyndam ya kiwon kiwon kiwa kreh neibhah ka sorkar da em ko i yong ka hi i rukom kreh.
Discussion about this post