“Ka Voice of the People’s Party (VPP) ymtoh u lehke ko wei diñ neibhah wa daw chah ktah deiwa joor ya ki khynroo khyllood ka jylla wei daw chah thang lut waroh”, da ong u Montri ka chnat puræ puthi, u Rakkam A Sangma ynne ka sngi.
U Montri da kdaw u leh ya ka mukotduma yong u snem 2014 heiwa da em i pyrchah ya ka sorkar Maharashtra hajrong ka hukum wa da pynmih heiwa ka Supreme Court da ong ko wa ymye wow booh bhah palat 50% du neibynta kawi ka jaitbru, wei ka yung bichaar leh da pyndam ko ya kani ka hukum hapoh ka jylla Maharashtra wei da phah Circular ko leh cha waroh ki jylla ka ri yow pynkynmoo ymtoh u booh palat 50% yei bhah hapoh ka Reservation Policy neibynta kawi donhi ka jaitbru.
“I da em i hei maa neibhah ka Meghalaya da yoh ko 85% ka bhah neibynta ki jaitbru ri-loom hapoh ka Reservation Policy heiwa ki 80% da bhah hapyrdi ki Khasi-Jaiñtia wa ki Garo katwa 5% won neibynta kiwi jaitbru ri-loom.”
“Hawa ka Supreme Court paan jubab ko na ki jylla, ka sorkar Meghalaya ha ka 27-03-2021 da jubab ko wa 85% toh kawa da booh bhah neibynta ki jaitbru ri-loom tangwa ka Supreme Court ym pu em ong ko iyi iyi hajrong ni,” da ong u Rakkam.
Da pynkynmoo u leh sa ya kawi ka mukotduma ha u snem 1992 wa da bichaar da ka Supreme Court kawa da phah ya ka sorkar Kerala wa kawon kawon ka Reservation Policy neibynta ki kreh ymtoh wow em ko palat 50%.
Kamtæ da ong u wa lada pteiñ ya kani ka Drama, ye u jia iwon iwon wei ym chah Blai ya chah pyndam pathan ka Reservation Policy ka Meghalaya, wei i hap i wow bahkhlieh neibhah da em kiwi ki Reservation Policy wa wanrah ki sorkar kiwa da chah pyndam. Lada jia ini, ki juk wa daw wan ym maap de ki ya i.
Kam wow pynkynmoo wa u heh ka VPP, u Ardent M Basaiawmoit kattæ dang pynman u ya ka chah thngan kawa da khlem booh por yow dawa na ka sorkar yow pynkylla noh ya ka Reservation Policy.
