Da: U Da O Emi Lamar
Ka Wah Myntdu næ ka Syiem Myntdu kamwa jooh khut maya i ka, mih ko na ka chnong Mihmyntdu, chwa u kær tawiar ko ya ka sor Jowai. Ha kini ki sngi ki bnai wa da lai, dang joor i chah ktah ka Wah Myntdu. Ki jhep ki jakhlia kiwa kai ha kani wah khari khari, booh ko yei kylli hapyrdi yong i waroh, kammon u pynneh pynsah i ka? Deiwa kyruiñ wei chim nuksa i na ka Syntu Ksiar, u sñiawthooh chooh i ya itæ i miat pynngaad ka Myntdu wei heijooh i por leh, ki rai eh rai dam kiwa chem i.
Hawa pyrkhat bniah i, jan du ha Syntu Ksiar donhi dang yoo i yei miat ka Wah Myntdu ha sor Jowai. Ka Syntu Ksiar ne ka Treriat kamwa jooh khut kiwa chong chnong Jowai, man ko ka thaw lai-ke, lai baam la’ӕr pynngaad. Hawa lai kjat cha Syntu Ksiar, u yoo phi ya ki hali kba kiwa kær ya ka sarok Chyrmang na waroh ar liang, kiwa khwe dakha wa ki warep kiwa pooh hali næ wa ah kba. Heini yoo i yeitæ i sbun yong ka Syiem Myntdu, deiwa pyndap pynbiang ko ya u kba, ki dakha, ki khloo ki tap wei ya ki thaw pynngaad.
Ymtoh du ini don hi, ya u mot sah naam u Woh Kiang Nangbah leh da pynyieñ ha Syntu Ksiar kam ka parom wa da hiar pateiñ na ki waheh nachwa, wa ya u Woh Kiang Nangbah da rai yow jied kam u khon dap chynrang wow yaleh pyrchah ya ka sorkar phareng heini ha Syntu Ksiar. Katni ki sngi, kani ka thaw da man ko leh ka madan siat khnam.
Ki thaw lai uiñke da pynmiat chooh chooh da ka chnat Soil and Water Conservation chirup wa ka Jaintia Fishing & Environment Protection Association, wei da chna ki ya ka Dam yow pynbiang um cha ki hali wei kamjooh leh yow pynneh ya ka Fish Sanctuary. Hapyrdi kini ki thaw lai uiñke, ki wah khian kiwa jngiar kiwa mih na khap ki loom, ka kchaaid Umkhangrah kawa em pyn ha kylla loom ha Syntu Ksiar, man ki ki thaw kiwa yoosuk ka rymaw.
Tangwa iwa sñiawsih toh manda chlai um ka Wah Myntdu heipor wa kyrha u slap, yoo i ya kitæ ki klong Plastic, ki jhep kiwa harukom wa tooid kyllieñ soodong ha Pynthorwah. Kamjooh leh ki bru lai baamdoh kiwa jooh pyntaroi deiwa noh kat chawa yoh ya ki jakhlia jakhliat. Ki khyndaw soo wa rah ka um na ki thaw kreh yung, thaw chna surok wa pynjngut ki ya ka um ha Syntu Ksiar.
Boon ki seiñ næ ki chnong kiwa jooh pynman ki yei pynkhooid yonglang ya ka Syntu Ksiar, kam ka Panaliar kawa da chimkti wow pynkhooid ya ka Syntu Ksiar khari khari. Kyrmen i wa kani toh u man nuksa ko ya i waroh khnang yow pynmyllien i u pynkhooid ya ka Myntdu ymtoh du ha Syntu Ksiar donhi, tangwa waroh ha man la ki chnong wa lai luti ko. I khooid i jngiar emkaam bha ko ya ka imlang sahlang waroh.
Chooh chooh, deiwa pait u sylli i, u e warom wei u pynneh i ya u kynjri maya uwa teh ya i ki bru wa ka Wah Myntdu. Lada ymem ka Myntdu, i naam yong ka Syntu Ksiar leh u wiar hi-eh ko.
Discussion about this post