Ka JSU War Jaiñtia Circle hadien wa ood kiwa khayi moo wa kiwa yah kari ka thaaiñ War Jaiñtia kiwa da pynsñiaw wa ki Weighbridge wa da pynkrehkaam da ka chnat Transport ka sorkar Meghalaya toh du ka thaw khrong poisa tooh ki heh ka sorkar heiwa da chim kabu ki ya i kit palat pood ki truck chalan moochuni wa mookynroh cha Bangladesh neibhah wa ka sorkar da chah ko wow kit du 12 Ton kawi ka truck.
Ka JSU da pynbaad ko wa kawi pa kawi ka truck wa lai lyngba kani ka Weighbridge heiwa da booh leh ya ki bru ka sorkar (Enforcement Inspector) wei heiyatoh wa ka Amsarim Weighbridge ka leh em ko hapoh i pait u Enforcement Inspector wei da tip wa kamwa T. 1000 hap su ki truck hajrong ka T. 200 wa emkaam wow su ki cha ka sorkar ryngkat wa ka Slip wow yoh u lai lyngba kani ka thaw. Na kani ka T. 1000 kamwa T. 500 toh ka bhah yong ki wakreh Enforcement ka Amsarim kiwa dawa na kawi pa kawi ka truck.
Ka seiñ da ong ko leh wa ini i chim kabu ka sorkar da pynman ko ya kiwa boon kiwa khayi moo wow yap nong ki heiwa i dor u moo ym yahaap de i wa ka bai lutsan wow tih wei wow khayi ya kini ki mar.
Ka seiñ da pynbaad ko leh wa boonsien ka bai lutsan lai ko cha ka kata ki bru samen wa ki heh sorkar heiwa boon dooh i su toh ha ki Weighbridge.
U President ka JSU War Jaiñtia Circle, u Eddy Kery Pohtam da ong u wa i kaam khayi moochuni hawa wyrchaw wa ki snem wa dadep ha ki snem chwa u 2016 chwa u mih ki Weighbridge (kiwa da kheiñ prychah aiñ da ka sorkar pyrdi) wa kiwi won ki khyrdop khrong pisa ki chnat sorkar, ini i kaam khayi moochuni da man ko kawa wanrah myntoi chiboon ya ki wakreh wa imja na kani. Tangwa katni won da man ko kawa eh bha heiwa katni da wanrah myntoi sa du ki heh sorkar kiwa baam suk ya iwa kreh chitom yong kiwa kreh ha ini i kaam.
