Ynne u Director, AH&Veterinary ka jylla, u Dr. KB Sahkhar da ong u wa i kaam psan mrad hapoh ka West Jaiñtia Hills dang duna bha i lada wyrchaw ya ka jylla waroh kawi. Yeini da ong u heipor wa pynman ya ka lehwarom ya ka sngi wow tipmit ya i yabi kjut hapyrdi ki mrad wa ki bru ya kawa tip leh chi tyllup ka pyrthai kam ka ‘World Zoonosis Day’ ha Jowai.
Da ong u wa neiliang ka sorkar da sdang ko ya ki Mission wa boon wow wanrah yei kylla hajrong i rukom psan mrad heiwa da sdang ya ka Milk Mission tangwa katkam ka yukheiñ da chem wa ka West Jaiñtia Hills toh kawa duna dooh ha i pynmih dud iwa man du 24 gram samen chi sngi katwa haka jylla hi waroh kawi man i 85 gram katwa ha ka ri won man i palat 300 gm.
Hajrong ini da ban joor u wa emkaam wow pynchlur yei psan masi neibhah wa ki mrad wa psan hi yarap ki wow pynmyntoi ha iwa boon i liang khamtam hei yoh kreh ki khynroo khyllood.
Ha kani ka yalang da yaklam leh hajrong i psan ya ki sniang heiwa da sdang ya ka Piggery Mission heiwa da em leh du kattu katni donhi ki Society na Ri-loom Jaiñtia kiwa da wan chaphrang heiwa da kylli u leh wa neiyi i daw wa rieh ki bru khamtam ki seiñ kam heini i por wa ka sorkar tyrwa yarap ko.
Da kdaw u wa i yoh sngiang ha ka jylla ha ki 5-7 snem nachwa man i kamwa 5 lak, tangwa ha kini ki 5 snem lyngba ki Program wa ha rukom da ye u pynku cha ka 7.5 lak, heiwa da kdaw u wa ini i ku pynyoo i wa kiwa psan mrad yoo ki wa ki sniang toh kawi na ki laad wow wanrah ya i yoh i laad deiwa kyrmen skem wa ha u snem 2025 daw em sa kawi ka thong heiwa na ka 24% daw ku cha ka 35% wei lada ye u leh kamni daw mut i wa nadooh u snem 2030 daw ye u pyndap sniang ya ka jylla waroh kawi.
Heijooh i por da ong u wa lyngba kani ka chnat em boon ki Project wa kynthup leh ya ka Ri-loom Jaiñtia khnang wow ye u pyndap yei emkaam hapoh ka jylla khlem wanrah de ya ki mrad wa psan na baar jylla.
