Jowai : Kamwa pteiñ yei kynmoo warom ya ka lyngkhooh snem yap 153 u Woh Kiang Nangbah ka Seiñ Khynroo Khyllood Committee Ka Seiñraij Jowai ynne ka 28 tarik da pynman ko ya Rah Mookhrah ha Madan Ryngkaw, Tpep-pale.
Kani ka Rah Mookhrah toh ka yakop pynyoo bor kamjooh i buit u rah ya ki 5 tylli ki moo wa em i khia 22 kilo, 56 kilo, 58 kilo, 99 kilo wa u 107 kilo ha i jngai wa 51 phut.
Da em 13 ngut ki wa wan chimbynta ha kani ka yakop da ki dong wa pher wa pher ka chnong Jowai kamjooh na Tuber wa na Mukhaialong.
Da yabhah ya kini ki 13 ngut ha ar bynta deiwa yieñ mar pyrchah hei jngai wa 51 phut. Uwi pa uwi da rah u cha chilliang katwa da rah biang cha chilliang da ki wa chimbynta ki wa em na chilliang.
Waroh ki wa chimbynta da ye ki u rah suk hadooh wa poi u moo wa khia 99 kilo boon ki wa ym ye u pynkhih namo wa pynhap ya u moo chwa u poi ka thong wa 51 phut.
Kamtæ ha u moo wa khia 107 kilo da sah sa ar ngut don hi kitæ toh u Da-O Hi Dhar na Umchangiar u wa man leh u wa da jop ya kani ka yakop kattu la ar snem lynter wa u Mantre Lato u wa na Dulong.
Da sdang chwa u rah ya u moo wa 107 kilo da u Da-O Hi wei da ye u pynpoi hadooh 43 phut duna du 8 phut na ka thong.
U Mantre Lato hei prychang yong oo da ye u rah 31 phut hewi wa lait u moo na kti yong oo. Deini wa hap u moo, u Da-O Hi Dhar da yoh biang u yei naam jop kattu la le snem kamjooh wa ka song poisa wa T. 2 Hajar.
Da pyntip leh U Chairman ka Khynroo Khyllood Committee u ma Wyraiki Kharbuki wa ini i rah ya uni u moo wa khia 107 kilo man ko ka sien nyngkong wa em wa ye u rah ya uni u moo hadooh 43 phut.
Hadien kani ka Rah Mookhrah da pynman won sa ka Kynthih Chiap Pyllah.
Na ki chynrang da jop u Hame Shylla wa kynthih wa jrong 12.1 phut, wa ar u Wim Shylla 16.7 pynar na Tuber Kmaichnong.
Na ki kynthai da jop ka Dakahi Kyndait wa kynthih 11.4 phut wan wa ar ka Pleasant Shylla 11.1 phut pynar na Tuber Kmaichnong.
Waroh da em 18 ngut ki chynrang wa 4 ngut ki kynthai wa wan chimbynta ha kani ka Kynthih Chiap Pyllah.
Discussion about this post