Ka yalang wa kyrpang ka thaiñ Laskeiñ wow yada ya ka rymaw

Jowai: Ka khubor kawa e mynsien wa ki Dorbar Chnong katni khamtam ha ki thaiñ Mowkaiaw da sdang ki u krehlang wa ka sorkar wow pynneh pynsah ya ki mrad khloo, ki sim ki doh wa ki dakha ha jar jiar ki loom ki wah yong ki.

Kani ka khubor da mih ko na ka yalang kawa pynman ha Iawmuksoo ha Mowkaiaw kawa em hapoh ka Laskeiñ Block yong ka West Jaiñtia Hills District.

Ha ka yalang kawa ha pyrdi ka yaw ynnin ka sngi da man ko kawa nyngkong heiwa da emlang ka H. Lato kawa man kam ka DFO (Wild Life) yong ka District kawa da batai che chaphang ki aiñ kiwa yatoh wow yada kamjooh wow pynneh ya ki mrad khloo. Da batai ko leh chaphang ki kyndon ka aiñ wa ye u pynchitom wei wow kset patok ya kiwon kiwon kiwa tynyap ya ki mrad khloo, kiwa dai kamjooh kiwa baam ya ki.

Da yoh leh ya i klam na u H.H. Mohrmen uwa pynkynmoo wa ka dustur riti hi yong ka jait bru toh wow burom ya ka bei rymaw wa waroh kiwa em hapoh yong ka. Da ong u leh wa katni da emkaam biang ya i wow kynmoo i yeini waroh yow kheiñkor ya iwa da e ka bei rymaw ya i kiwa em soodong sookun wei wow im dei suk dei saiñ wa ki.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U J.M. Pohsngap uwa man kam u DFO Territorial hei klam yong oo da pynkynmoo u wa hadooh ka Bible leh da em ko boon ki bynta wa sikai chaphang wow pynneh pynsah ya ka rymaw.

Da batai u leh ya kiwi de ki aiñ wa yada ya ka rymaw wei da sñiaw yoh mynsien u nei klam ki Waheh Chnong wa kiwa kiwa mihkhmat yong ki chnong waphær waphær kiwa da khana yei kreh chitom ki ha jar jiar ki chnong yow pynneh pynsah ya ka bei rymaw.

Ha kani ka sngi da emlang leh u Golden Star Dkhar, Chairman ka Biodiversity Management Committee (BMC) yong ka chnong Mowtyrchiah–A, u Jenis Suchiang u Waheh Chnong ka Mowtyrchiah-B kamjooh leh u Wympher Suchiang, Chariman (BMC) Mowkhap u Bekin Kamar u Waheh Chnong ka Chnong Mowkaiaw; waroh kini hei klam yong ki da pynsñiaw ki wa ha ki chnong yong ki da kreh chitom ki wow yada ya ki mrad khloo.

Da pyntip ki leh wa ka chnong da pynmih ko ya ki aiñ wym hoi de u siat mrad siat sim wei katni da sdang biang u sñiaw ya ki sur ki sim ki doh ha ki chnong yong ki.