Jowai : Ka Thomas Jones College hei yakrehlang wa ka Jowai Blood Bank da pynman ki ya ka yalang ha ka College kawa hajrong ka phang “Blood Connects Us All” kam chibynta ki kaam wa jooh leh ka National Service Scheme (NSS) yow pynchlur ya waroh ki khynnah wan puræ thymme neibha man u snem ka NSS Unit yong ka Thomas Jones jooh pynman ki ya ki Blood Donation Camp ha Jowai.
Ha ka yalang ynne ka sngi da em leh u Dr. S.S. Nongbri uwa pait ya ka Blood Bank ha Jowai uwa da khana cha ki paidbah wa i e snaam ym toh iwa pynsih yei doh i pran u bru hei sakhiat pynchait pynkhiah ko ya u bru neibhah i snam toh iwa ye u pynmih thymme hadien wa da e snaam.
Da ong chooh chooh u leh wa ki stad Science hadooh katni ym ye ki u chna yei snaam, lada ym em wa wan e snaam da man i iwa ma bha neibhah boon kiwa kjut wa mynsoo u yap ki. Da pteiñ deiwa ong wa i snaam yong i ymtoh u pyrkhat wa u e O ki du ya kiwa ha yung ha sem namo ki para niam ini i pyrkhat kamni man i iwa bakla bha.
Heijooh i por leh ong u wa ya kiwa dai snam da man i iwa be-aiñ, katni pdiang du ya kiwa wan e snaam dei mon sñiawbha yong ki.
U principal ka College u Dr. R.R. Kharkongor da ong wa emkaam bha yei e snaam wei da chem u leh pyn ha yung yong oo manda em wa kjut, chitom bha u yoh snaam. Heijooh i por leh ong u wa chem u ha ki form yong ka college boon ki khynnah heipor wa phah pyndap yei Blood Type da ieh ki ki khlem pyndap ini toh iwa ma bha lada pyn ya ka Blood Type yong ki leh ymtip ki.
Ha kani ka sngi leh da em ka yalehke drama da ki khynnah ka NSS yow pynyoo yei emkaam u e snaam wei kamjooh leh ym hoi u tieñ u e snaam.
Da saam leh ya ki khusnam cha kiwa jop ha ka yakop dro hei yatoh i emkaam u e snaam sñiawbha.
Discussion about this post