Jowai: Kamwa yaka tayaw lehkmen wa 66th ka All India Co-Operative da sdang wow lehkmen yaka ha kylleiñ ki thaw yong ka ri nadooh ka 14 tarik uni u bnai, da sakhi wa ha Jowai leh ka yung krehkaam u Assistant Registrar of Cooperative Society deiwa ya krehlang waka Meghalaya Cooperative, Apex Bank Ltd. Jowai da ya snohkti leh ki wow lehkmen deiwa pynman yaka yalang ha ka 18 tarik uni u bnai ha Auditorium Cum Sports and Cultural Hall ka Lion Mission Compound Dorbar Chnong, Jowai hajrong ka phang kawa ong “Role of Cooperatives in New India” waka “New initiatives of government through cooperatives”.
U A.M. Lyngdoh S.R.C.S Amlarem Civil Sub Division hawa e yei klam da pyntip u wa kani ka sngi man ko leh chibynta wow e yaka wyrta yei rukom krehkaam yong ki Cooperative Society, neidaw wa ki em ki ka bynta wa kongsan tam wow pynkylla ya i im yong ki paidpah haka ri hi waroh kawi.
Neitæ da ong u leh wa ka phang yong uni u snem da klam ko yei angnood wow pynman yaka ri kawa thymme deiwa wanrah yaki kylla ha u bru kamjooh ka imlang sahlang.
Neiliang u G.W. Biam, Area Manager MCAB Ltd. Jaiñtia Hills District, da klam u heiyatoh wa ki laad yarap wa ye u yoh napoh ka Meghalaya Cooperative, Apex Bank, nalor ki Policy krehkaam waphær waphær.
Ha i jooh i por da pynchlur u yaki paidbah wow chimram neibynta wow kyntu yaka kaam ka jaam, wei wow pyntip wa ka Bank yong ki ka e ram ko leh cha ki warep lyngba ki Society.
Nalor kiwa boon ki chakri, da pyntip u leh wa daw pynjan chooh chooh ki chakri cha u paidbah lyngba ki kari ki wow lai cha ki chnong ki thaw waphær waphær wow yarap pynsuk yaki paidbah haka kynchew poisa.
Ka R. Saioo, naka Kyntulang MPCS, hawa klam, da pyntip ko wa i lailuti yong ka kam kawi wa da embynta da boon boon snem bha hapoh ka Society, da ong ko wa i em hapoh ka Society yarap bha ko neibynta i lai luti wa chakhmat wei man ko leh kam u thied wow pynpoor ya i yatoh kaam na kawi ka chnat krehkaam sorkar cha kiwi won.
Kamta da kyntu ko wa hawa em hapoh ka Society ym toh u yooluti du ya ki laad yarap yoh mynkna naka sorkar tangwa toh u chim leh ki ram neibynta wow ku chakhmat.
Kiwi de wa klam kynthup ya u N.S. Wahlang, Assistant Registrar of Cooperative Society Jowai, u Ivan Marbaniang Project Manager, Meghalaya Basin Development Agency, ka S. Surong, ka O. Lato wa kiwi.
Discussion about this post