Ka sorkar jylla ynne ka sngi da lum ko ya kiwa yahkhmat niam wa ki balang na waroh kawi ka jylla neidaw wa duna i wan kiwa chong chnong wow chim yei tika yada na u COVID-19. Ya kani ka yalang da khut da u Chief Secretary ka jylla, u MS Rao deiwa ya emlang lang u DHS (MI), u Dr. Aman Warr, ki sahep wa ki Doctor yong ka chnat i chait i khiah najrong kiwa yahkhmat na ki niam waphær waphæ kiwa em ha ka jylla.
Hawa klam hadien ka yalang, u DHS da ong u wa ha ka yalang da ya phyllu sani bha yei artatien ki bru wow chim yei tika, wei da pyntip u leh wa kiwa yahkhmat niam sñiawkhia ki hajrong ki khubor hamsaya, wei da kyntu ki ya ka sorkar wow leh deiwa eh ya kiwa yahbakla ya ki paidbah hawa yatoh wa i tika wow yada na u khñiang khlam.
Da pyntip u leh wa kiwa yahkhmat niam da pynsñiaw ki wa ka yakhun yong ka jylla ym toh du ya u khñiang khlam wei kamjooh ya ki bru kiwa wanrah ya ki khubor kiwa yah bakla kiwa da ktah yei bha i miat ki paidbah ka jylla.
Da sñiawskem u leh wa deiwa boon kiwa wan chakhmat wow chim yei tika, daw ye leh wow yada ya kitu ki wym hoi u chim yei tika kitæ toh ki khynnah wei kani ka yukit chong ko hei tympha yong uwi pa uwi. Wei kam ki Doctor da yoo ki yei rukom ktah u khñiang ya kitu kiwa chim yei tika wa ya kitu wym chim yei tika heiwa ki wym chim yei tika toh kiwa chah ktah joor bha hadooh wa poi chei sñiawsih katwa kiwa da yoh tika kiwa chah ktah ye ki wow yaleh pyrchah.
