Jowai: Ka yalehke football Tiger Five ynne da man ko ha pyrdi ka Loomkyrwiang pyrchah ya ka Pnar United heiwa ka yalehke na pyn artylli ki dhab da pynhun sakhiat ki ya ki wa paitke neibhah ka yakhun da man ko kawa yatyngkhooh bor wei yathaaiñ bha.
Ya ka kool wa nyngkong yong ka kylla step da yoh chwa u thap da ka Pnar United ha ka minit kawa 2 lyngba u Simion Suchiang, katwa ka Loomkyrwiang da yoh ko u su ya kani ka kool ha ka minit wa 8 lyngba u Marford Najiar.
Hadien kini ki kool ka yaleh na waroh arliang nangjoor nangjoor kawa pynyoo yei chemphang yong ki hadooh ka minit kawa 20 heiwa ka Pnar United da yohlaad ko u thap ya ka kool wa ar lyngba u Datngen Dan.
Kiwa yalehke yong ka Loomkyrwiang nei chah yap ki da yoh ki wow pynyatoh kool ko deiwa thap ya ka kool wa ar ha ka minit kawa 30 lyngba u Leonardo Laloo, kamtæ ka yalehke yong ka kylla step da kut ko da 2-2 kol.
Ha ka yalehke yong ka kylla miet da man ko kawa yoosuk bha neibhah na waroh arliang da pyrchang ki wow thap ya ki kool, katwa kiwa yang kool na pyrarliang da man ki kiwa pliah heiwa da ye ki u yada ya ki boon tylli ki kool kiwa da pyrchang kiwa yaleh u thap.
Khaddooh syndet ha ka minit wa 54 ka Loomkyrwiang da yohlaad ko wow pyntam ya ka kool wa le lyngba u Founder Passah. Kamtæ ka yalehke ynne da kut ko 3-2 heiwa ka Loomkyrwiang da yoh ko wow psiah cha ka round wa ar yong kani ka lympung.
Mynstep ka 6 tarik nawon heipor 2:30 i sngi ka Spartan FC u yaleh pyrchah ko ya ka Mehi United, katwa heipor 3:30 nawon ka Cham Cham FC u yaleh pyrchah ko ya ka ELSA FC.
Kamwa pynkynmo ka ELSA FC toh ka dhab kawa jooh yoh u rah yei naam jop ha kani ka lynpung yong uni u snem wa da dep.
Discussion about this post