Ka yaw pynyoo rong ya ki maar rep ha Jowai

Jowai: Ka yung krehkaam ka District Horticulture Officer, West Jaiñtia Hills District, ynne ka sngi da pynman ko yaka yaw pynyoo rong mar rep nadooh ki jhoor ki soh, ki syntu wa kiwi kiwi ha ka yalang wa pynman ha madan Jrisaleiñ Chutwakhu Jowai, kawa da wan chimbynta da ki warep naki chnong waphær waphær ka District.

Katkam ki ktien waiphang naka B.M. Majaw, District Horticulture Officer da ong ko wa kani toh ka laad ya ki warep wow pynyoo ya ki maar rep yong ki, nalor wa man ko chibynta i jop yong ki haka rep ka riang.

Kamwa ha kani ka jooh ka sngi da lehkmen leh yaka sngi ki “Ngap” kamtæ da kyntu yaki warep wow ri ki leh ya ki ngap khnang yow pynku ya i yoh i kot yong ki, neibhah ki ngap yarap ki wow pynmih syntu pynmih soh.

Da ong ko leh wa neiliang ka sorkar kwah ko wow pynku yaka rep ka riang wei ka yaleh ko wow wanrah ya ki Scheme waphær waphær ki wow rep ya ki jhoor wa yahap katkam wa man i thaw.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U W. Marbaniang, District Agriculture Officer da kyntu ya ki warep wow chim kabu yaki Scheme sorkar wei wow kreh hok haki chnong ki thaw nadooh wa sdang thung yaki jhoor næ syntu toh u man kiwa bniah wei wow paan yarap leh naka chnat sorkar wa yatoh wa iwa emkaam ki.

“Ka kaam rep toh ka kaam wa emburom wei ki warep man ki kam ki chipai ka ri neidaw wa pyndap pynbiang ki ya ka ri waroh kawi “. Ong ka R.S. Mannar, ADC West Jaiñtia hawa e yei klam kam ka symbood kongsan.

Da ong ko leh wa man iwa sñiawsih wow yoo yei chem chitom wow pynlai yaw yaki maar rep wei chah ksih dor, hanlada kattæ leh kyrmen ko wa ka sorkar daw ye ko wow yarap ya ki.

Neiliang u kongsan, u Andrew Shullai MDC Jowai Central, da e burom u ya ki warep wei kamjooh ki chnat wa pait ya ki warep wa lyngba i kreh chitom yong ki da sdang ku ka kaam ri ngap wa i rep ya ki jait jhoor wa boonjait haka District.

Kamtæ da kyntu u ya ki warep wow yajan ki wa ki chnat krehkaam ka sorkar yow thooh yaki buit stat thymme khnang wow wanrah boon ki myntoi, heijooh i por leh yow hiar pateiñ yaka kaam rep haki khon ki kti khang yow yoh myntoi ki pateiñ wow wan.