Ynne ka sngi ka Women’s Welfare Organisation ka Seiñraij Jowai da pynman ko ya i lehkmen sngi kyrpang ki khynnah namo ka Children’s Day 2024 ha yung dorbar ka Seiñraij wa em ha Loompyrdi Iongpiah, Jowai heiwa u President warim, u OR Shallam da man u kam u kongsan.
Kani ka lehkmen man ko chibynta wow pynwyrngia ya ki khynnah wa em ha ka Playschool wa ka Crèche ka Seiñraij.
Ya ka lehkmen da pynlai da ka Waisa Sumer kawa man ka Chairperson ka WWO kawa da khana ya ki kaamram ka chnat krehkaam ka Seiñraij wa da sdang nadooh u 1987-88.
U OR Shallam kam u kongsan da ong u wa ka Children’s Day toh ka sngi ha chi tyllup ka ri India kynmoo ki wow sñiawngooh ya u Prime Minister wa nyngkong ka ri, u Pandit Jawaharlal Nehru.
Da ong u wa kani ka sngi man ko ka sngi ki khynnah heiwa u Nehru da pynlut por u wa u Mahatma Gandhi wow yaleh laitlooid wei da chah jied u kam u PM wa nyngkong ka ri.
Chooh chooh da ong u wa da em ki khynnah kiwa da yoh sikai na kani ka Crèche kiwa katni da man ki kam ki sahep, ki Doctor wei ngait skem u wa kini ki khynnah daw wanrah burom biang ki ya kani ka thaw deiwa kyrpaad ya ki bei ki pa kini ki khynnah wow kyruiñ dieñ biang cha kani ka yung hadien habood.
Heijooh i por da kyntu u ya kiwa sikai kani ka thaw wow e sikai iwa man salonsar ya waroh ki khynnah.
U OR Shallam da pynkynmoo u wa nachwa jooh lehkmen ya kani ka sngi ha Biar Ka Blai ha ka 14 tarik u Khonchonglad tangwa katni won ym em de u ksoh ya kani ka sngi heiwa da lehkmen ya ka ha ka 13-12 tarik em won wot hadien ka 16-17 tarik neidaw ki Exam.
Da pynphooh ya ka lehkmen da ki chaad na u Paila Ksiar chirup wa ka Lasubon Ksiar 2024, u Salanda Oo Langdoh wa ka Manhaka Pakyntein kamjooh na ki khynnah ka Play School wa ka Creché heiwa kani ka lehkmen da pynka’it mynsien bha ko ya ki khynnah.
Ha kani ka sngi da yoh ya ki kyntien ngoohblai na ka Duhaki Kyndiah kawa man kawa sikai ka Play School wei da yoh ya ki kyntien khublei na ka Ridaka Lamar kawa man ka Secretary ka WWO.
Discussion about this post