Ka Kutumba Surakshya Parishad (KSP) kawa man ka seiñ niam Hindu na Assam, da kam ko wym em de i khang ya ki Hindu wow lai mane Blai hapoh ka krem Mawjymbuiñ kawa em ha Mawsynram.
Kani ka seiñ kawa da maham wot wow khang ya u sarokbah wa psiah cha Meghalaya, da wanpoi ko ha nongbah Shillong ynne wow embynta ha ka yalang wa da khut da ka Deputy Commissioner ka East Khasi Hills yow pynbait yei kaam wa yatoh wa ka krem Mawjymbuiñ.
U President ka KSP, u Satya Ranjan Borah da ong u wa ha ka yalang da klam che wym em de i khang wow lai mane Blai hapoh krem Mawjymbuiñ, tangwa daw hap wow bood won ya ki kyndon, wei ka krem Mawjymbuiñ daw wai man-ka-sngi yow lai paitke wei wow mane Blai.
Da ong u wa hei yaklam da pynbait leh wow leh kyrpang ha ki bnai ba tip kam ka Sawan Mahina kawa lehniam kyrpang ya u Shiva katkam i ngait ki Hindu, kawa jooh pynman ha u Naiynñiaw wa u Naisaphra man-u-snem.
U Borah da ong u wa kamwa man kattæ, i kaam wa yatoh wa ka krem Mawjymbuiñ da kut ko, wei ka KSP daw yang ko ha ki kajiak sngi iyi wow jia, wei hadien itæ daw chim rai kammon wow leh.
Hajrong ini i kam ka KSP, neiliang u Assistant Waheh Chnong ka Mawsynram, u Hiamdor Rapsang da ong u wa lada ka KSP dang pynkulmar ko kamwa ong ki, mut i wa ka yalang wa da khut da ka Deputy Commissioner ym poi ko cheiwon cheiwon leh.
Da ong u leh wym em itæ i yaklam wow chah u mane Blai hapoh krem Mawjymbuiñ, tangwa u man bait ko kam ka thaw uiñke suwari wei ki bru ye ki wow lai deiwa bood leh ya ki kyndon wa ka dorbar chnong da booh ko.
Discussion about this post