U National President ka NPP uwa man leh u montri rangbah ka jylla, u Conrad K Sangma ynne ka 12 tarik da wai u ya ka yung krehkaam ka Party ha nongbah Delhi hei emlang u symbood montri rangbah ka jylla, u Prestone Tynsong, u symbood montri rangbah ka Manipur u Joykumar Singh, ki MP wa kynthup ya u Dr. W R Kharlukhi ka Agatha K Sangma wa kiwi kiwi.
Hadien wa da man ka NPP kam ka National Party wa 8 ka ri, da yoh ko ya i yung krehkaam lyngba ka sorkar India ha 75 North Avenues.
Ha kani ka sngi ka kurim u (L) PA Sangma, ka Soradini K Sangma da emlang ko chirup wa u montri rangbah warim ka jylla, uwa man leh u National Vice President ka Party, u Dr. DD Lapang.
U Conrad da pyntip u wa ya kani ka yung krehkaam ka NPP daw ye ko wow pyndap yeiwa emkaam wow man kam ka National Party heiwa da man ko kawi na ki 8 tylli ki National Party hapoh ka ri.
Da ong u wa ymjooh em ki seiñ saiñ hima na ka thaaiñ mihsngi ka ri kiwa da kynjoh ya kani ka kyrdan wei daw man ko leh kam ka kynti wow sah khana parom ya kiwa boon.
Chooh chooh da ong u wa ka NPP da kreh ko wow kynjoh ya ki kdong ka ri ha ki thaw wa emkaam yarap hanla sdang ko wow kyruiñ ya ka thaaiñ mihsngi heipor wa sdang ya ka.
Da ban joor u wa dei skem i krehkaam ka NPP daw man ko kam ka Party ka wow yakhun ha ki Election wow wan kam ha Manipur, ha u 2022 heiwa da kyrmen wow yoh ya u montri rangbah ka jylla da uwi na ki kyrtong ka NPP.
Neiliang u Prestone Tynsong da ong u wa ini man i por wow sah kynmoo parom ya ki paidbah ka thaaiñ mihsngi deiwa yoh ya i yung krehkaam wa pura ka NPP ha nongbah Delhi deiwa kyntu ya ki dkhot ka Party wow kreh hajrong ki thong yong u (L) P.A. Sangma.
U symbood montri rangbah ka Manipur, u Joykumar Singh da ong u wa ka NPP da kreh ko wow pyntikna ya i bha i miat ka thaaiñ mihsngi waroh kawi.
Ha kani ka sngi da chong yalang leh wa ki wakreh ka Party ha ki jylla waphær waphær ka ri.
