Jowai: “Kam ki khon Kristan i toh u pyrkhat bha i wa kammon u lai kammon yeiñ i ha ki sngi wa katni, ym du wow kam wa i toh ki Kristan katwa ki kaam wa i leh won ym yahap wa i mon u Blai,” ong u Rev. B.D Shangdiar hawa e u ya ka khubor i ktien u Blai haka yaseiñ Samla KJP Synod Mihngi kawa 17 kawa pynman ynne ka sngi ha i por 10 waje haka Balang Presbyterian Wapung, Musniang Wapung District, West Jaiñtia Hills District.
Da ong u leh wa ha kini ki sngi wa i im i, em chiboon kiwa lai yalap cha kylleiñ kiwa kam toh kiwa bood ya u Blai tangwa em du khajik kiwa pyndem hok ha i mon u Blai. Nalor wa i im i leh haki sngi wym yoh chooh i chaniah wot hayung hasem kamjooh.
I man Kristan wa sakhiat emkaam ka dohnood wa khooid, wa kiwon kiwon wa ong wa ki toh kiwa bood u Jisu ki toh leh u lai ki kamwa lai u ym toh du wow kam man Kristan wei emkaam leh wow pynyoo dei kaam.
Ya kani ka khubor u Rev. B.D. Shangdiar da pynchong yurim u naka chithi wa nyngkong u Ioannis 2:6. Deiwa ong leh wa ka chithi u Ioannis da tip leh kam ka chithi kawa man salonsar neidaw wa da thoh cha waroh ki balang ki paaid wa man Kristan ha waroh kawi ka pyrthai.
Kani ka yaseiñ da sdang ko nadooh ka 8 tarik hadooh 10 tarik uni u bnai hajrong ka phang “To sumar ba ioh men klet ia u Blei jong me” Deut. 8:11.
Haka yaseiñ wa pynman heipor 01:00 waje won da yoh i klam na u Pastor SG Ryngksai uwa da e ya ka khubor u Blai naka Esekiel 10: 18-19 kawa yatoh wow burom ya u Blai.
Chooh chooh ha kani ka sngi da pynkup burom leh yaki 4 ngut ki khun khynroo ka Synod kiwa da poi cha khmat haka Exam SSLC.
Discussion about this post