Jowai : Hadien wa ood ki tre hali wa em kiwa tih chyiap ha i bynta Yongkaskot/Kdongstong wa em ha Treriat, harood ka Umkhangrah da ong ki wa ini i tih chyiap ye i u ktah ya ki hali yong ki.
Neiliang u Wyrta da hiar u cha ini i thaw yow pynsakhiat yeini, ini i thaw wa da tih ya u chyiap toh i yong u Joy kyndait, wei da sakhi wa em i pyn hajan iwi i hali wei harood ka Umkhangrah.
Heini ya u chyiap da tih u Sooniki Chyrmang uwa na Mihmyntdu wei da kam u wa oo wow bahkhlieh lada jia iwon iwon i oor ki stiar hali. Da ong u leh wa tih u ya u chyiap yow chna hali u wow rep wei chim wai u yeini i thaw na u Joy Kyndait.
Ya u chyiap dai ki T. 500 chi kari khian wei T. 3000 chi truck Shaktiman.
Hei yatoh won wa i yohbor (permission) na ka JHADC wa na tnat Forest Department da pyntip u Sooniki wa da phah thap kot u ha uwi u Starly Shylla, uwa na Mihmyntdu.
Neiliang u Starly da kam u wa dang yang u ya ki kot ki sla na JHADC wei neiliang yong oo da yaklam u wa u CEM ka JHADC u ma Thombor Shiwat, wei u ma Thombor da e bor u wow tih wei wow yarap wa ki kot ki sla wa emkaam ki.
Hei yaklam wa u ma Thombor da kyntait u wa da e bor u wow tih chyiap wei neiliang ka Council ymjooh ebor kulmar hi-eh ko khamtam katni wa da em ka hukum wa khang yei tih chyiap.
Discussion about this post