Ka seiñ Meghalaya Peoples’ United Front (MPUF) ynne lyngba u President yong ka, u Dapoiwanmi Laloo da ong u wa heiyatoh wa ka khubor wa pynmih da u bru wa kamtre ya ka Petrol Pump ha Laskein, da kana u wa ini i kaam toh iwa da leh da ka Laskeiñ Unit heiwa da leh ya ka Inspection wei da chem wa duna i phñiang wa e kani ka Petrol Pump heiwa da em ki sakhi sabut kam ki Video wow pynyoo yeitæ.
Da ong u wa ha ka Inspection da chem wa duna i phñiang wei da ujor leh ya ka FIR ha Raliang Police Station kamjooh leh ka ujor cha ka Metrology Department heiwa da leh ya ka Joint Inspection ha katai ka Petrol Pump.
Da ong u wa iwa phylla toh wa da pynbaad u tre ya ka seiñ deiwa ong wa biang hi ka Pump u heiwa da ong leh ya ka Metrology Department wym emkaam de u lai leh ya ka Inspection, wei manda lai ko da chem wa biang won ka Petrol Pump.
“Kammon biang ka Petrol Pump u hawa lai sylli (Check) donhi, hawa ym em Check tæ hoi hi u thok ya ki paidbah,” da kylli u Dapoiwanmi.
Heiyatoh wa ka chithi wa paan yarap (Donation) ka seiñ, da ong u wa kam ka seiñ hawa em kiwon kiwon ki yalang wa heh wa jooh pynman ko, jooh paan yarap ko na kiwa kitbok (well-wishers) yong ka wei ym e laad ya ki bru samen wow chim kabu næ wow thok ki ya ki paidbah.
Da kylli u wa heiwon ka poisa yarap (Donation) wa da e u tra ka Petrol Pump wei heiwon theh phñiang mynkna ki dkhot ka seiñ, wei lada ymye wow pynsakhiat hapoh chi tayaaw neiliang ka seiñ daw leh ko yeiwa emkaam katkam ka aiñ.
Hajrong i duna ka Petrol Pump, da ong u wa ini i kaam wa da chimkhia ki toh neibynta i hok ki paidbah, wei lada sñiawbiang ki wow pteiñ u pyndap phñiang neini leh man iwa dooh myntoi ya ki paidbah hi.
Discussion about this post