Ka Meghalaya Pradesh Congress Committee (MPCC) da pynsñiaw ko yei sñiawkhia wei da dawa wow thung da ka kynhun takit wa laitlooid hajrong i oor i khlieh tnoom (Dome) wa da pynchong hajrong kani ka yung dorbar chna aiñ wa thymmai, heiwa i kreh dang lai i hadooh katni.
U Working President ka MPCC, u Pynshngain N Syiem da pynsñiaw u yei lyngoh hajrong i e Sub-Contract wow kreh ya kani ka yung cha ka BRC Ltd, neibhah kani ka Company da chah kyntait ko heipor wa thap Tender neidaw wym toh kawa da biang wow kreh namo kawa man ‘Inexperienced’. Da ong u wa da lyngngoh wa ka Rajkhiya Nirman Nigam Ltd. da chim ko wow pynkreh yei kaam hei lut wa T.127 klur hanla da dep mang T. 145 klur da ka jylla, wei da kylli leh ya ka chnat PWD (Building) kammon da e laad ya ka BRC Ltd. wow kreh Sub-Contract hawa ha ka Tender da kyntait.
Da ong chooh chooh wa kammon ya ka Tender wa khut hei dor T. 145 klur, katwa ya ka poisa da pynlait hadooh T. 170 klur na ka ka T. 217 klur, iwa pynyoo wa da em i pynthymme yei dor i kreh da boonsien, deiwa pynrap wa lada e hei dor wa palat T. 200 klur da toh wow e cha ka Company kawa biang dooh kawa ye u kreh leh deiwa bha tam.
U PN Syiem da ong u leh wa khnang wa waroh u che wei wow chem yeiwa sakhiat toh u thung da ka kynhun takit wa laitlooid kawa toh da ki Central Agency.
Da dawa u wa ya ka BRC Ltd. toh u e dei dak rong yonh (Blacklist) wei ym toh wow e laad wow kreh ya iwon iwon i kaam hapoh ka jylla. Da ong chooh chooh wa ka chnat PWD (Building) kamwa da yoo toh kawa ym ye wow kreh yei kaam, wei pynrap u wa daw poi i por wa ya ki kaam næ Project yong ka sorkar pyrdi ym chah de ko wow pynkreh da kani ka chnat.
Hajrong i ong u Executive Engineer ka chnat PWD (Building) wa i daw yong i oor kani ka Dome toh neidaw wa khia, neiliang uwa yahkhmat ka Congress da ong u wa i pynche toh i wym em yurim kajiak leh, neibhah u Engineer em u ha i thaw wa kreh waroh chi kattu wei da toh wow rah yeini hakhmat kiwa toh u pait.
U PN Syiem da ong u wa i klam u EE toh du wow yada donhi.
