Ka Hynñiewtrep Integrated Territorial Organisation (HITO) da phylla wei khyrngiat ko wow yoo yei pynche ka JHADC ynnin hajrong ki Weighbridge wa ki Forest Rvenue Station wa em ha Sonapur wa Ratacherra, East Jaiñtia Hills.
Ynne ka sngi neiliang u General Secretary ka HITO, u Wanbun Dkhar da ong u wa i pynche ka Secretary ka JHADC ynnin ka sngi deiwa kam wym em ya kitæ ki Weighbridge tangwa ki kot ki sla wa yoh lyngba ka RTI wa deilang ha ka Budget ka Council da klam che wa em ko le tylli ki Weighbridge, kawi ha Mookyndur, Sonapur wa ha Dawki.
Da ong u wa iwa phylla dooh toh wa ynnin ka JHADC da pynche ko wa da thung ya u Sevenborn Tang kam u Agent ka Council wow pynlai ya ki Forest Revenue Station deiwa ong wa i daw wa e kti ha ki bru samen toh khnang wow yoh myntoi rap boon bar wow pynlai pyn da ka Council hi.
Hajrong ini, u Wanbun da ong u wa lada kamtæ katkam ka Budget uni u snem da ong wa ha u 2024-25 ka Council lyngba kini ki Forest Check Point næ ki Forest Beat House da yoh ko Rs. 11,50,000 deiwa pynlai ka chnat Forest ka Council katwa deiwa e wow pynlai ha ki bru samen ha u 2025-26 da yoh ko du Rs. 5,00,000 wei ini man iwa phylla bha heiwa kammon kheiñsap ka Council tæ e wai ko kamni heiwa da heh ka Rs. 5 lak ya ka Rs. 11.5 lak.
Da pynrap u leh wa ini i leh toh wow yoh u baam tooh donhi bar u lai ka poisa cha ka Council.
Chooh chooh da ong u wa ka seiñ da dawa ko wow khang noh ya kini ki ar tylli ki Check Point ha East Jaiñtia neibhah katkam ka jubab RTI da ong wym em ko ya kitæ ki Check Point wa Weighbridge katwa ha ki kot ki sla ka Budget da thoh che wa em hi kitæ ki Weighbridge.
Heijooh i por da ong u wa ka JHADC ym em yoh bor ko na ka Ministry of Road Transport and Highway (MoRTH) ka sorkar pyrdi wow booh næ pynlai ya kini ki Check Point næ Beat House ha u sarokbah katkam ka aiñ The Control of National Highway Land and Traffic Act 2002 kamtæ kini ki Beat House man ki kiwa pyrchah ya ka aiñ.
Neiliang won u Founding Member ka HITO, u Lawyerson War da ong u wa katkam i pynche ka JHADC ynnin da kam wa u Sevenborn Tang toh u Agent wa da thung da ka Council wow pynlai ya ki Weighbridge wa ki Check Gate neibhah katkam ka jubab RTI da ong wym em u e wai ya kini ki Weighbridge wa Forest Check Gate, kamtæ da dawa u na ka Secretary ka Executive Committee wa toh u e ko dei thoh wa nadooh ynnu da thung ya u Sevenborn kam utæ u Agent neibhah yaphær mar dei kangtleiñ i jubab RTI wa i pynche ynnin ka sngi.
Da ong u leh wa i baam tooh hapoh ka Council man iwa joor bha kamtæ ka seiñ da pynkhreh ko wow pynman ya ka Signature Campaign ha ki sngi wow wan neibhah wa ymtoh wym em poisa ka Council tangwa ymtip ki kammon wow pynkreh wow man ko kawa dap wa biang.
Discussion about this post