U Working President ka United Democratic Party (UDP), u Titosstarwell Chyne da ong u wa ka UDP toh kawi ka seiñ kawa da chah kawang ktieh bha ha kani ka Election, deiwa chah klam beiñ wa ka UDP toh ka seiñ sdien Bus donhi.
“Nga ym sñiawthooh O ha kawon ka rukom wa i sdien i ya katæ ka Bus, ka UDP hapoh District Council da yahkhmat ko ya ka Executive Committee, i ym em sdien Bus i, 3 snem chiteiñ nga da man O kam u CEM wei hadien wa nga da chah pynhaap noh kam u CEM, i ym em da sdien Bus i, tangwa i chong i ha ka Liang Pyrchah, kat hadooh kattæ nga dang man O kam uwa yahkhmat ka Liang Pyrchah”, da ong u Titos.
“Phi ye phi wow ong won wa hapoh ka sorkar jylla ka UDP ka yakrehlang ko waka NPP. Ki mat yong ka jylla yaphær ki na ki mat yong ka District Council”, da ong u.
Da ong chooh chooh u wa ka UDP ha kani ka Election MDC ympu toh i por wow yaklam ya ka mat næ ki kaam yong ka MLA.
Chooh chooh da ong u wa heipor wa man u kam u Chief Executive Member ha KHADC, ka sorkar jylla da thmu ko wow pynkrehkaam ya ka CrPC wa CPC yow pyndooh noh yei bor wow bichaar mukotduma da ki kasari yong ka District Council, tangwa neiliang ka KHADC da yakhun ko hadooh Supreme Court wei kattæ ki kasari yong ka District Council da yoh biang ki yei bor wow bichaar ya ki mukotduma.
“Heipor wa nga man O kam u CEM, ya ki mat wa hap i wow pyrchah da pyrchah. Da em kawi ka mat wa ka sorkar jylla da wanrah ko wow pynkrehkaam ya katæ ka CrPC wa CPC, kawa yatoh wa i bor yong ka yung kasari yong ka District Council, neibhah ha District Council i em i ya ka bor wow bichaar, i em i ya ki District Council Court, tangwa neiliang ka sorkar jylla da pyndooh noh ko yei bor”, da ong u Titos.
Da khana u wa dang ini wadep ka KHADC da ujor ko cha ka Supreme Court wei da pynsangeh ko yeini i knieh bor yong ka sorkar jylla, wei pynrap u wa em chiboon kiwi de kiwa da yaleh pyrchah wei ymtoh wa suki hi-eh, tangwa em won ki kaam wa hap wow ya krehlang neibynta i bha i miat ki paidbah.
Discussion about this post