Hadien i thooh wa palat chi tayaaw ya ki chi kurim kiwa na Indore wa wiar ha Sohra, ynne ki pulit ka East Khasi Hills da chem ki yei metyap u Raja Raghuvanshi, na i synrang Riat Arliang hajan ka Wei Sawdong Parking Lot.
U Superintendent of Police ka East Khasi Hills, u Vivek Syiem da ong u wa ynne heipor 11:48 i sngi, u Drone da chem u ya iwi i metyap wei i thooh ya ki chijur da leh da ki pulit, ka State Disaster Response Force (SDRF), Special Operations Team (SOT) wa ka West Jaiñtia Hills District Adventure Mountaineering Club.
Neidaw wa synrang ware i thaw wa chem yei metyap, da wanrah noh cha Wei Sawdong Parking Lot heiwa da em ki Magistrate wow pyndep yei kaamram hapyrdi 3:30 wa 4:00 waje i janmiet.
Da tipmit ya i metyap da kiwa ha-yung toh lyngba i Tattoo wa thoh yei pyrtuid “Raja” ha ka kti timun.
Na ini i metyap da chem ya kaT-Shirt kynthai rong lieh, i dawai Pentra 40 chi sla, i bynta ka LCD Screen ka Mobile Phone Vivo wa ka Smartwatch na kti i metyap.
Ya ini i metyap da kit cha NEIGRIHMS, Shillong wow leh ya ka Post-Mortem wow tip yei daw wa yap u Raja.
Ki pulit ym em u kyntait ki iwon iwon heiwa da pynman yeini kam i kaam chah tynyap wei da thung ya ka Special Investigation Team (SIT) wow pynman yei takit.
Heiyatoh wa ka kurim u Raja, ka Sonam Raghuvanshi ympu tip heiwon em ko wei i thooh ya ka dang pteiñ i hapyrdi i pynthut i suiñbneiñ wa i man i long i thaw.
Neiliang u Vivek da yaroh u ya waroh kiwa da emkti wow thooh ya kini ki chi kurim hadooh ynne ka sngi.
Discussion about this post