Ka HYC da beiñ joor ko ya i wym mano ka sorkar hajrong ki mat wa dawa kiwa sikai SSA wow su noh ya ka tulop yong ki kawa da sah la 5 bnai.
Ka seiñ da ong ko wa i klam khlem yurim u Montri ka chnat puræ puthi ka jylla, wa ka sorkar ymye ko wow pynman ya kiwa sikai SSA kam kiwa sikai ka sorkar jylla ha ka chnat puræ puthi wei i kyntait ka sorkar wow pynku ya ka tulop kiwa sikai SSA wot hapyrdi i ku dor ki mar baam wa kiwi kiwi man i iwa pynyang yei maa heiyatoh wow pynku ya i stat i tip hapoh ka jylla.
“Da em kamwa 12541 ngut kiwa sikai SSA ha jylla wei kamwa 2907 tylli ki LP School wa kamwa 2259 tylli ki UP School, iyi wow jia ya kini ki skur wa ya ki khynnah puræ ha ki weileh u khang noh ya ki mo du nei wym mano ka sorkar ya i dawa kiwa sikai?” da kylli ka seiñ.
Chooh chooh da ong ko wa ha u snem 2021 da yoh ya u Montri wa Fail Class XII la le sien, weileh ha ki snem wow wan daw yoh da kiwa Fail Class X kamtæ ter ter.
Da kylli ko leh wa kammon ka sorkar India ym su ko ya ka tulop kiwa sikai SSA ha Meghalaya katwa ha kiwi ki jylla ym em u dooh tulop ki, neibhah ka SSA toh ka Scheme kawa da mang poisa chwa ha ka mang tangka (Budget) heiwa ka sorkar jylla da kam ko khlem i sakhiat wa ka sorkar pyrdi ym em pynlait ko ya ka poisa.
Ka seiñ kyntu ko ya ka sorkar wow pynlait noh ya ka tulop kiwa sikai SSA wei wow yaklam wa ka sorkar pyrdi wow pynlait noh ya ka poisa.
