Kammon u tip phi lada kiwa ha yung ha sem ki lok ki jor da sdang ki u dih drugs

Jowai : Hapoh ri-loom Jaiñtia kat dang lai ki sngi ki por kiwa dih drugs dang boon dang boon ki kamjooh leh kiwa dai drugs. U drug wa khlan dooh kiwa pynemkaam katni toh uwa tip kam u Heroin uwa man leh uwa syad bha uwa ye u poi hadooh T. 2000 cha neiñ chi gram.

Ya uni u drugs uwa man kam u powder wa lieh da dih ya oo deiwa inject ha u thied. Da khleh nyngkong ya oo wa ka um wei hadien wa dep kiñ da pynemkaam ya u kymphaad yow taan ya ka um yoh u neh i jakhlia charood wei hadien da taan won ya kani ka um na u kymphaad da u thyrnia (Syringe).

Kiwa ha yung ha sem boon ki por ym tip wa u khon næ ka khon toh kiwa dih Heroin neibha manda kreh uni u drug kiwa dih ym heh ktien næ chongchit ki kam kiwa muaaid kiad. Wei em leh kiwa ye u leh ya ki kaam wa kreh ki heipor wa dih ki ya uni u drug.

Kamtæ chimpor u tip wa u bru man u uwa dih Heroin lait noh manda kyrni uni u drugs wei wym hoi de u dooh ya oo, sdang ki u man ki bru u wa pisa lang-a (restless) wei kwah ki du ya uni u drugs yow poi ki cha i pyrthai wa uni u drugs pynpoi u ki lada ym yoh ya oo ym sñiaw ye de ki u chah ya i man ka sngi yong ka pyrthai.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Em ki dak ki chin wa ye phi u chem kse wa da sdang pynemkaam drugs ki bru:

1. Sdang ki u ieh ya ki lok warim yong ki wei da sdang ki u yatoh lok wa kiwa ym pu jooh tipmit ki.
2. Sdang ki u riam deiwa phær neiwa jooh riam ki nachwa.
3. Ki pyllung khmat ki sdang ki u soo wei syndip.
4. Khlan ki u paan poisa wei lada dooh ki poi u pood hadooh wow tooh ki pyn na yung.
5. Em ki por neh ki chislem bha ha paikhana wa dih ya u drug.
6. Ki kha thyrnia cha thied kti yong ki.
7. Sdang ki u yut skur u dam u lai Class.

Kam ki lok, kiwa ha yung; emkaam u yarap ya kiwa dih drugs neibhah boon na ki kwah ki u ieh yeini tangwa em ki por kiwa ha yung wa kiwa boon ki paidbah sdang ki u yoobeiñ ya ki iwa pyndooh mynsien ya kiwa boon kiwa kwah u yaleh yow lait na u kynjri wa da kdoh u drug.

Em leh kiwa ha Jowai kiwa da yoh kjut HIV deiwa pynemkaam lang ya u thyrnia kamtæ emkaam u yarap ya ki yow lait ki u poi ki cha ka luti wa ym ye u kyruiñ dien.

[youtube id=”-9huWlXFA1s” align=”center” mode=”normal” autoplay=”no” maxwidth=”1170″ grow=”no”]