U Montri Rangbah ka jylla, u Conrad Kongal Sangma da ong u wa em ki thaw ha khappood wa da tipmit kam ki thaw wa yakynaad, tangwa da tih bniah wei da chem wa kamwa 20-30% ym em i kynaad.
Hadien i yaklam wa ar sien hapyrdi ki ar ngut ki Montri Rangbah ka Meghalaya wa Assam, da sdang pynbait noh ya ki khappood ha u Naiynñiaw wa Naisaphra uni u snem heiwa ka sorkar MDA da lai ko leh chaphrang wow booddien ryngkat wa ki Regional Border Committee hajrong u pood.
Hawa yaklam wa ki laad pathai khubor hadien ka yalang wa ki Regional Border Committee, u Conrad da ong u wa da em leh ki thaw kiwa eh wow pynbait wei kiwa emkaam bha u phyllu yumut bha neibhah wa ka sorkar ym kwah ko wow yakhleh lang tangwa wow pynduna chwa ya i eh i khoo wei won pynbait iwi hadien iwi.
Da ong u wa ini i pyrchang ka sorkar toh wow pait da kiwi ki rukom pynbait ya u pood deiwa thooh yutip kammon ki bru katni im ki ha khappood, i sñiaw yajan yong ki waki bor synchaar, heiwa da pynrap u leh wa ka sorkar pait ko leh ya iwa em chwa katni ha ki khappood wei lada man ki thaw kiwa ye u pynbait emkaam deiwa ya hunlang.
U Conrad da ong u leh wa ka sorkar ynne ka sngi ha ka yalang wa nyngkong wa ki RBC da paan yeiwa chem ki Deputy Commissioner ha khappood, wei hadien wa da klam yillu bha ka sorkar sñiaw emkaam chooh chooh ko yow tih bniah ko kammon wow lai chaphrang wow ye u pynbait noh ya u pood wa ka Assam.
Chooh chooh u Conrad da ong u wa boi hadien wa dadep bichaar lut wei hadien wa da kut ka Dorbar Chna Aiñ ka jylla daw ye biang u yachem ki ar jylla.
Hawa kylli, u Conrad da ong u wa ki DC toh ki Member Secretary ka Committee kiwa da pyntip yeiwa chem ki, kam i em kiwa chong chnong kiwa chah ktah ha khappood, kiwa chong chnong katwon ngut kiwa cha liang ka Meghalaya wa cha Assam, i chim ya ka bordiñ ha ki chnong wa kiwi kiwi.
