Ki warep kiwa haap hapoh ka Agroecolgy Learning Circle (ALC) kiwa wan na ki chnong waphær waphær hapoh ka West Jañtia Hills District da wan ki wow chimbynta haka pynyoo rong yow pynim, pynsah ya ki symbe jhoor kawa da pynman da ka SURE deilang wa ka NESFAS kawa da pynman ynne ka sngi ha chnong Sohmynting.
Ha kani ka sngi kamwa 56 jait ki symbe da wanrah da ki warep na ka chnong Sohmynting, 55 jait naka Community Seed Bank na ka chnong Mulum, na ka ALC ka chnong Lumtrep da wanrah 18 jait ki symbe, na ALC ka Larnai 11 jait wa na Ksehrynchang 12 jait.
U Ebor Langshiang uwa man kam u Research Scholar kamjooh u Assistant Secretary yong ka Dorbar Chnong Sohmynting da khana u chaphang ka spah rymaw lyngba ki mar rep wa ki jhoor khloo kiwa u Blai da booh kyrpang u ha ka chnong Sohmynting. Da pynkynmoo u leh wa ka chnong Sohmynting ka em ko ya ki jait jhoor wa pawnaam kiwa da mih na kani ka chnong kam u Saphlang wa u Salah Sohmynting wa ki soh kam u Salyngkiah kiwa da jooh khut nachwa kam u Sohmynting.
Neiliang u Mynjurlang Langdoh Pyrtuh uwa man u General Secretary ka Dorbar Chnong da pynkynmoo u wa ka chnong Sohmynting man ko kawa mahajon hei spah rymaw kawa em le tylli ki khloo kyntang hapoh ka chnong kam ka khloo Langdoh ka kur Pyrtuh, ka khloo Kyntang ka kur Kyndait wa ka yong ka Kur Langshiang.
Ki warep kiwa da e yei klam ha kani ka yalang toh ka Nesly Shadap naka ALC ka chnong Larnai kawa da klam chaphang i sboh wieh, ka Wanpoiri Shadap naka ALC ka chnong Lumtrep kawa da klam chaphang i rukom rep syiñ, i eh wa yachem ki wei kammon da jop ya ki. Ka Roomika Pyrtuh naka ALC ka chnong Sohmynting da klam ko chaphang ka rukom rep saphlang katwa ka Rihun Sungoh naka ALC ka Ksehrynchang da klam ko chaphang ka rukom rep chru soo. Neiliang yong ka SURE da klam da u Waiphangki Shadap.
Ki ALC kiwa napoh ka Cluster kiwa da ya emlang ha kani toh 6 tylli na Sohmynting, Ksehrynshang 4 tylli, Lumtrep 2 tylli wa na Larnai 2 tylli. Kiwi won ki ALC kiwa da wan wow chimbynta ha kani ka sngi toh ki ALC na ka chnong Mukhap, Iooksi wa kamjooh ki Community Facilitators na ki 20 tylli ki chnong kiwa da ya emlang ki ha kani ka yalang.
Khnang wow ya saam lang ya ka khubor chaphang kani ka Project, da khut lang leh ya ki Village Organiser na ki chnong wa marjan kam na ka chnong Lumkhudung wa na Pyllonginkhaw.
Ha kani ka sngi da emlang leh kiwa sikai wa ki khynnah skur na ka Demthring Presbyterian Secondary School wa kamjooh leh ki khynnah wa kiwa sikai na ka Secondary School ka Sohmynting.
