Da u: Khroo L Pariat
Ym toh u tieñ u sorsa phi ya katæ ka kjut wa poor ha India ha pyrthai, wa ha chnong ha dong yong phi.
Ym toh mo wa kani toh ka kamram ka yong i ki bru kiwa man kiwa chong chnong yow yarap ya kyrchaan kylliang i chirup, yow ye u pyndooh pyndam ym toh du ya kani ka kjut, tangwa yow biang ka baam ka dih ha chnong wa ha ka ri?
Pyrkhat bha, ya ki khon, kiwa ha yung yong ki Doctor, Nurse ki sahep sorkar, ki Magistrate wa yaleh ki u pynbiang pyntoh, ki pulit, ki Asha ki Anganwadi, ki Volunteer Home Guards kiwa su ka sorkar du dei nongsngi, ki Waheh Chnong wa kiwa krehkaam chnong kiwa kreh mon sñiawbha donhi.
Related posts
Pait wa skem i sñiaw i mynsien i yong ki yow ye u pyndooh pyndam ya kani ka kjut na phi wa na nga.
Pyrkhat bha, kammon ki waheh kiwa man kiwa hayung ki yong phi, ki yong nga chirup wa i yah khmat u Kiang Nangbah, u Dolloi Kiri, ymtoh mo wa khlan i sñiaw wa i mynsien i yong ki, wa pynim ki ya ka jait ka kynja hadooh wa im i katni, ym em tieñ ki u yaleh da ka thma bah, u kaap u lai hajrong ka met yap, hajrong i snam wa kai, yow laitlooid i hadooh katni na i man bro ha ka sorkar pharæng ha ki spah snem nachwa.
Ym kut du kamtæ, pyrkhat bha kammon ki manchwa ki longchwa ki yong i yaleh pyrchah ki ya ka khlam ha kitæ ki spah snem nachwa? Ym em Doctor, Nurse kamwa em katni. Ha kpær ha khloo wa pynthiah ki yow jngai na kiwa yoh kjut khlam. Sumaar ki dei stat i yong i hi, ha-o, khlaad kiwa khlaad, im kiwa im hadooh wa im i katni. Toh hi na ong kamtæ?
Ileh u tieñ u sorsa phi katni ya katæ ka kjut, hawa ki khon ki pyrsa wa kiwa ha yung ki Doctor, ki Nurse wa kiwi tawan kiwa yarap ya ki ym em u tieñ ki, pdiang ki kam ka kamram u yaleh yow ye u pyndooh ya ka kjut synrum, khai ky’oh, iñdoh donhi, na kitu kiwa yoh wa ya ka kiwa thiah ha Hospital wa chitom.
Kynmoo, ka sorkar, ki Waheh Chnong kiwa krehkaam chnong, ki Asha ki Anganwadi, ki pulit waroh toh ki bru kam phi kam nga hi.
Ki kyrpaad donhi ki ya i, yow chong i hapoh yung, ym toh na ong ha patok? Ha yung, i yung i yong phi hi, na ong.
Khanatang ya parom ya iwa bha, ebor e mynsien para bru, pynkhlan yei sñiaw yow im i mynsien.
Deiñ Mask hukum ki, lada mih phi cha sarok cha wa boon bru.
Ha-o, u laitlooid waroh kwah i, tangwa manda chait da khlan i ha ka chnong ka ri India. Kynmoo i laitlooid iwa sakhiat iwa kwah i u yoh toh i laitlooid iwa hun i ha mynsien, wa chngaaiñ i sñiaw para-bru, u imlang sahlang i chirup wa u em phi ka kamram u ya ryntih i chirup neibynta ka bei rymaw, ka tawiar takan. Kattæ yow pura i manbru longbru i yong phi i yong nga ha kani ka pyrthai chong wasa. Yow lait i u man kiwa choon ya ki khon ki pyrsa ki yong phi ki yong nga, kiwa daw heh manda tymmen, manda khlaad i neini na pyrthai.
Waroh na i, du kiwa daw kylla tpai, kylla khyndaw. Chi tyngka leh ym yoh u ksoh u rah mo.
Bru pyrthai ileh daw lai phi cha u Mars mo!
