Wot hapyrdi i khyrwait ka High Court ka Meghalaya yei tlot ka sorkar wow khang yei tih mooyong pyrchah aiñ hapoh ka jylla, neiliang u Montri Rangbah, u Conrad K Sangma ynne da ong u wa ki bru daw hap ki wow thooh da kiwi ki laad kamai ja-kpoh.
Da ong u wa neidaw wa i rukom tih mooyong hapoh ka jylla toh iwa da myllien la 200 snem wei da em boon kiwi ki jait khih kiwa da sdang yow pyndap yeiwa emkaam i khih mooyong, kamtæ da ktah ko ya kiwa boon wei lada ym ye wow thooh da kiwi ki laad wa thymme, ki bru daw lai biang ki chwa iwa da jooh myllien ki nachwa.
I chah khang tih mooyong deiwa leh da ka rukom yong rim toh lyngba ka hukum wa da pynmih ka NGT ha u 2014 iwa da dep 9 snem ha u Naitung (Apr) uni u snem.
Da ong u leh wa ymtoh iwa ye ya ki bor sorkar wow khang lut ya waroh i jait neidaw wym ye u lai na iwi i thaw cha iwi tangwa kattæ leh da leh katwa ye. Kamtæ da ong u deiwa pyrkhat neibynta ki por wa daw wan kammon wow leh yeini, da dep wanrah ya ka Policy wow leh Scientific Mining iwa da man kam i sdang wei kawi won ka laad toh yow pynchlur wow sdang da kiwi ki jait kreh.
Hawa kylli lada ka NGT leh ko khlem da pyrkhat ya ki bru, da ong u wa ka NGT da leh ko katkam i kaam yong ka.
Da ong u wa hawa kut hi kini ki jait kaam toh kiwa hap lai chakhmat kajiak chisien deiwa emkaam 5 snem yow ye u khang wa san snem yow sdang won da kiwa thymme wa sa san snem yow ye u khang lut sbak ya waroh.
Kamtæ da ong u wa hap e laad yow wanrah i kylla ha i rukom wa biang neibhah ini wa chah khang toh iwa syndet syndet heiwa manda khai thiah ki bru hei step da dooh lut ki ya waroh iwa da jooh myllien ki u leh la 200 snem wei ini toh i daw wa da chem chitom wow khang ya ini waroh iwa kattu da jan dap la 10 snem.
