Kat ya ki plastic, ki tre dukan ym ye de ki u saam mynkna hawa song tiar

Jowai : Ka yung krehkaam u Additional Principal Chief Conservator of Forest, Social Forestry & Environment, Shillong, Meghalaya ynne ka sngi da pynman ko ya ka yalang wow esikai cha ki tnat sorkar waphær waphær kamjooh ya ki paidbah hajrong ki aiñ wa yatoh wow yada wa ka bei rymaw.

Ki aiñ wa da batai da yaklam ha kani ka sngi da kynthup ya ka Environment (Protection) Act, 1981 wei da yoh yei pynche na u A.K. Srivastava IFS, APCCF (SF& ENV) uwa klam leh ya kiwi ki aiñ kam ka Hazardous & Other Waste (Management & Trans boundary Movement) Rules 2016 da klam u leh chaphang ka E Waste (Management) Rules, 2016.

Ki aiñ chaphang i jhep wa mih na ki yung kamjooh na ki kharkhana da batai ya ki da u W. Kharkhrang, Environmental Engineer, MSPCB.

Hapoh ka Solid Waste Management Rules, 2016 da ong u wa nyngkong dooh emkaam u pynyait ya i jhep ha pyrdi i wow pyut wa ki wym pyut wei lada pynman ya ki khawai kam ki bia wa em palat 100 ngut ki bru yeini da haap leh bait katkam kani ka aiñ.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da kyntu leh ya ki bor district wow sikai ya kiwa pyllang jhep u tip ki yeini neibhah lada ki tre yung da pynyait ki ya i jhep tangwa kiwa kit won noh lang ki ki daw man i iwa sep-ai.

Hapoh kani ka aiñ leh da kdaw wa ki yuslieñ (diapers) ki company wa pynmih ya ki haap pynbiang ki leh wa ka wi ka yusong yow pyllang yow suk u noh ya ki.

Hapoh kani ka aiñ leh kiwa noh roi ya ki jhep ki song baam cha luti syngkieñ daw chah daiñ kuna ya ki (Spot Fine).

Hei yatoh wa ki muna Plastic won da ong wa ka sorkar ym em khang ko u pynemkaam ya ki tangwa da khang ya kiwa dai dukan u e mynkna ya ki cha ki paidbah wei lada em wa kwah haap thied ki dei thied.

Ya ki tre dukan wa kwah u dai Plastic won haap ki u lai booh pyrtuid wa ki bor district wei haap su ki T. 4,000 chi bnai.

Ya kiwa pynemkaam plastic khlem yoh bor daw daiñ kuna hei dor T. 5,000.

Hei yatoh won wow chna yung chna sem kamjooh wow tympra ya ki yung warim, ki tre haap pynbiang ki ya ki kot ki sla wow batai bniah wa kammon u noh ki ya ki khyndaw ki dieñ wa mih na ki yung wa da tympra kamjooh i wa daw chna.

Ha kawa kut kani ka yalang ki paidbah leh da yoh laad ki u kylli chaphang kiwa boon ki mat khamtam hei yatoh wa ki kharkhana wa em ha ri-loom Jaiñtia, chaphang ka wah Lukha heiwa u Kharkhrang da ong u wa i kylla rong ka Lukha toh neidaw wa tih mooyong.