Da: U M.M.Thaiang
U Phadar Felix Matta SDB, u la khlad ha ka 17 tarik Jylliew 1963, ha ka jingkylla jong ka Bur (Khwan ong ka ktien Labang-Nongphyllut) kaba u shong katba u dangjam (kap shiliang) ia ka jingatphyllung jong ka wah Myntang.
Ka long kaba dei ban ym klet ia kiba ieid jong ngi, kiba la lehsbun ia ngi ki Labang- ki Nongphyllut bad uwei na kita u long u Phadar Felix Matta SDB, u Missionary babha uba la aiti met bad mynsiem iala ka jingim ym tang na ka bynta ka khubor babha u Jisu Khrist, u long ruh u Pioneer uba kyntiew ia ka jingnang jingstad ia ki nongshong shnong ka thain ban tip ia u A ia u B da kiba u plie ia ki Primary School ha ka por jong u kum ha Laher, Bandein, Mooriap, Morap bad ha kiwei de ki shnong hapoh ka Elaka u Dolloi Nongphyllut.
Haba pule na ka kot lyngkdop “A GOOD MISSIONARY” kaba thoh shaphang ka jingim jong u Phadar Felix Matta, la kha ia u ha ka 26/11/1910 ha shnong Buttigliera d’Asti, Italy bad u la khlad ha ka 17 tarik Jylliew 1963 ha ka wah Myntang ha ka jingwan jong u na shnong Thangrain sha iing Parish, Parish Raliang (Parish Mookyndeng ba mynta).
Related posts
U Phadar Matta u la im 53 snem, 24 snem u la im hala iing lajong kum u Nongrep Brisohwain. Kum u samla u long u briew uba tipbriew tipblei da kaba ai ia ki nuksa Khristan kiba bha. Ki kyntien jong u Trai Jisu kiba ong “Khie leit sha ki jaitbynriew baroh ban ialap ia ka khubor babha bad ia kiba ngeit da pynbaptist ia ki” ka kot lyngkdop “A GOOD MISSIONARY” lane u Missionary babha, ka ong ba kine ki kyntien u Trai Jisu, ki la pynduh thiah pynduh dem ia u Felix Matta. Ban leit ialap ia ka khubor babha, ha u Felix Matta ym don da kawei pat ka lynti lane ka lad lait satang ka jingim riewniam lane ka jingim Missionary. U Felix Matta uba don kane ka jingangnud kum u samla uba bha, u la iohsngew ia ka jingkhot ban long u Lyngdohniam bad u la rung ha ka kynhun ‘riewniam Seng Salessian jong u Don Bosco (John Bosco). Nyngkong kum u Aspirant saw snem hadien kum u Missionary ha Assam India.
U Phadar Felix Matta SDB, u la im khatsaw snem kum u Lyngdohniam. Naduh ka sngi ba la pynkyntang lyngdoh ia u, u la im tang na ka bynta ki mynsiem, ka khubor babha jong u Trai Jisu Khrist bad ban kyntiew ia ka bha ka miat ka longbriew manbriew jong ki briew. Shuh shuh ka kot lyngkdop “A GOOD MISSIONARY” kaba thoh shaphang ka jingim jong u Felix Matta ka ong ba kum u Missionary, u la ia kynduh shibun ki jingeh, ki jingpynwit na ka bynta ka khubor babha, hynrei hapdeng kine ki jingeh kum u shipai bashlur jong u Khrist u la ialeh bad jop thiaw ia baroh ki jingeh.
U Phadar Felix Matta, u long u Lyngdohniam uba riewblei, uba kmen, uba aitilut na ka bynta ka jingbha ia baroh bad u bym ju shongthait ban trei ia ka kam jingpynbna khubor ktien blei. U long u Lyngdohniam uba kloi ban len bad ban pynshitom ialade na ka bynta ka bha ka miat jong ki briew ha ka longbriew manbriew, ha ka jingnangkot nangsla bad na ka bynta ka jingpynphriang ia ka khubor babha u Jisu Khrist. Ka mynsiem jong u kaba dap da ka jingieidblei bad u long uba kloi ban tyrwa ialade na ka bynta ka jingbha jong kiwei. Ka kot lyngkdop “A GOOD MISSIONARY” kaba thoh shaphang ka jingim jong u Phadar Felix Matta, ka ong kumne “Da shisha u la long uba kloi ban tyrwa ialade haduh ka jingiap ha ka wah Myntang kum ka jingknia ha u Blei na ka bynta ban pynim ia ki mynsiem.”
Nangta ka kot lyngkdop ka ong ba shisnem shwa ka jingkhlad (jingiap ha ka wah Myntang) jong u, u la don ha Mawlai na ka bynta ka jingduwai Retreat bad kiwei pat ki Lyngdohsohblei. Ha ka 17 tarik Jylliew (June) 1962, u Phadar Matta u la pynlong marwei ia ka jingduwai Lynti Diengphna. Ha kata ka jingduwai lynti Diengphna,u la iohsngew ia ka sur jong u Jisu kaba pynbor ia u ban tyrwa lut ialade ha u Khrist kum ka jingknia na ka bynta ka jingkylla bamut ki nongpop bad ban pynlait im ia ki briew na ka jinglong mraw jong ki ha u ksuid u khrei. Shuh shuh ka kot lyngkdop “ A Good Missionary” ka ong ba ha kaba nyngkong u Phadar Felix Matta, u la sheptieng ia kata, hynrei u ong “Lada kane ka long ka mon jong me ko Trai, hakhmih leh ia nga katba me mon, ka Maria ka Nongiarap ki Khristan kan sa iarap ia nga”. Naduh kata ka sngi ha kaba u la ong “Ka mon jong me ko Trai kan long borabor na ka bynta jong nga”.
U Phadar Felix Matta u la bret lut ialade met bad mynsiem hapoh ka jingsumar jong u Jisu bad ka Maria ka Nongiarap ki Khristan bad u la iaid haduh Kalbari jong u na ka bynta ka jingkylla bamut ki nongpop bad ia ka jingpynim ia ki briew. Ka jingatphyllung jong ka wah Myntang kan shym la lah ban pynlip ia ka jingieid thoin thoin jong u Phadar Felix Matta na ka bynta ka jingpynim ia ki briew kiba donkam ia ka jingiarap jong u. U Phadar Felix Matta, u la khlad ha ka 17 tarik Jylliew 1963 ha ka jingkylla jong ka bur kaba u shong katba u dangjam ia ka jingatphyllung jong ka wah Myntang.
U Pope Ioannis XXIII, haba u kren shaphang ka jingiap jong ki Missionary kiba aiti la ka jingim na ka bynta ka jingbha jong kiba bun u ong “Wow ka jingitynnat ban iap hadien ba la im ia ka jingim baroh na ka bynta ka jingtrei ha ri Mission” Kine ki kyntien jong u Pope Ioannis XXIII ki iahap bha sbiak khlem tam khlem duna bad ka jingiap jong u Phadar Felix Matta u Missionary babha.
Ki nong shong shnong ka thain Labang-Nongphyllut kiba la iohpdiang ia ka khubor babha na u Phadar Felix Matta kin iai kynmaw ia kane ka sngi 17 tarik Jylliew 1963, ka sngi ka jingkhlad jong u bad kin pynlong ka jingduwai kaba kyrpang na ka bynta ka jingjahthait ka mynsiem jong u bad ki iai kynmaw man la ka 17 tarik jong man la ka snem ha kine ki 59 snem kiba la leitnoh bad kin iai kynmaw ha ki snem ki ban dangwan.
