Hadien wa khyllem noh ka Executive Committee wa da yahkhmat da u MDC ka UDP, u Titosstarwell Chyne kam u CEM ka KHADC ha ka 19 tarik uni u bnai, da mih i dak kylli wa lada u MDC wa da thung (Nominated) na ka seiñ UDP, u Bindo M Lanong daw neh u kam u MDC ha ka Liang Pyrchah.
Hawa pyrchang kylli na u CEM warim, da ong u wa nadooh u snem 2019 da em i yaklam wow thung ya u MDC na ka UDP, wei da kyrmen wa ka NPP u burom ko yeini i yaklam wa da yahkhmat da u (T) u Dr. Donkupar Roy ya ka UDP. Khamtam wa u Bindo man u u MDC wa da rangbah bha wei uwa da rim bha ha ka saiñpyrthai ha District Council wa ha ka jylla.
Tangwa heijooh i por u Titos uwa man leh u Working President ka UDP da ong u wa lada ka NPP pyndam noh ko ya u Bindo itæ chong ha ki won neibhah ki wa em hei bor.
Neiliang u Bindo M Lanong leh da pynsñiaw u yei jooh i sur wa chong ha ka sorkar kawa em hei bor, lada pyndam næ ym pyndam chong bait ha ki wei itæ toh i rukom.
