Ka Environment Coordination Committee (ECC) ka Elaka Sutnga ynne da lai yachem ko wa u DC ka East Jaiñtia Hills heiyatoh i pynslem wow pynkrehkaam ya ka hukum wow tympdung ya ki karkhana Coke kiwa da pynmih nadooh ka 7 wa 11 tarik uni u bnai kiwa da leh ynne ka sngi heiwa u DC da pyntip u wa da leh yeini ynne ka sngi wei daw pteiñ hadooh wa dep u tympdung ya waroh 34 tylli kiwa da chna pyrchah ya ka aiñ.
Neiliang ka ECC da pynsñiaw ko yei kmen wa da sdang ya ini i tympdung neibhah wa da yakhih ko ya ini la ar snem.
Da ong leh wa i yakhih kattu u man i pyrchah yei e bor kulmar ka Meghalaya State Pollution Control Board (MSPCB) ya ki Consent To Establish (CTE) wei daw pynsakhiat wa i leh ka MSPCB toh iwa da leh khlem da pyrkhat.
Ka ECC da ong ko wa ka High Court kattæ da paan ko yei pyrtuid ki bru wa pteiñ u pynkrehkaam ya kini ki karkhana pyrchah yei aiñ wei ki leh man ki kiwa smat wow khana lut yei pyrtuid ki bru wa sdang ya kini ki karkhana wa pyrchah aiñ hapoh ka District.
Chooh chooh da ong leh wa da biang ki sabut wow pynyoo ya kiwa leh Benami hapoh ka District katkam wa chem lyngba ka RTI na ki chnat sorkar heiwa da em 32 tylli kini ki karkhana wa da mantre da kiwa na baar tangwa da em kiwa leh Benami yow yoh ya ka CTO (Consent To Operate) namo wow sdang krehkaam noh hadien wa dep u chna.
Da pynsñiaw leh yei khyrngiat wa hanla ya ini i kaam da bichaar da ka Supreme Court, ka High Court wot ki District Court wei da dep leh wow lai e boon ki dorkhat ha u Montri Rangbah tangwa ka MSPCB ha ki bnai wa sdang uni u snem da e bor wow sdang u chna (CTE) ya 3 tylli ki karkhana Coke ha East Jaiñtia Hills kitæ ka M/s Magic Coke, M/s M.M. Minerals wa M/s Presidium Breeze kiwa em ha chnong Nongsning iwa dang haap hapoh ka Elaka Sutnga wot lada kini ki karkhana da dep chwa wow tip toh kiwa da dep wow leh pyrchah ini wa dep wot hadooh wa da dep chah deiñ kuna ki neidaw wa da pynychna khlem da yoh CTE heiwa yeini da dep leh wow pynyoo hakhmat ka NGT ha u snem wa da dep. Kamtæ da kylli wa lada ka MSPCB tip ko namo ym tip ko chaphang kini ki karkhana.
Kamtæ ka ECC da dawa ko wow pyndam ya ki CTE kini ki 3 tylli ki karkhana hapoh ar tayaaw lym kamtæ daw leh deiwi ka luti wei ki heh sorkar wa emkti u e CTE toh u jubab ki.
Hajrong ini da ong wa ini i e CTE pynyoo ko wa ka sorkar kawa katni ym em pyrkhat ko yei sur ki paidbah kiwa da pyrchah joor yei booh ya ki karkhana Coke hapoh ka District.
Ka ECC da tyrwa ko leh yei yarap cha u DC waka MSPCB lada emkaam yarap ki wow tympra ya kini ki 34 tylli ki karkhana Coke wa man pyrchah ya ka aiñ yow ye u pyndep heipor wa biang neibhah ynne da ye wow tympdung du ya ar tylli donhi kitæ ka Halari Coke wa em ha Umthe waka M/s Sauryansi Coke kawa em ha Salang kiwa waroh ar kiwa dang haap hapoh ka Elaka Sutnga.
Discussion about this post