Shillong: Hadien wa yoh sa kawi ka manbei ya u khñiang COVID-19 ynnin i miet, kawa man kawa 12 kawa da yoh ya uni u khñiang ha ka jylla Meghalaya, heiwa na kini da em 11 ngut kiwa dang em ya uni u kñiang hadien wa khlaad uwi, wei kini ki 11 toh kiwa chait wa khlan wei ym em ware ki.
Hawa pyntip yei long i man hapoh ka jylla, ynne ka sngi u Symbood Montri Rangbah, u Prestone Tynsong da pyntip u wa hadooh ynne ka sngi ki Test wa da phah da em 933 tylli, napyrdi kini 821 tylli toh kiwa ym em ya u COVID-19 (Negative), katwa ya kiwi kiwa dang sah dang yang yaka Report.
Heiyatoh wa kawa dang yoh ya uni u khñiang, u Prestone da pyntip u wa man ko waka chait wa khlan wei da chah sumaar ko ha Shillong Civil Hospital. Da pyntip u wa kani ka manbei toh kawa naka chnong Mawprem kawa da dep leh ya ka Quarantine ha yung nadooh ka 13 tarik uni u bnai, hadien wa sñiawthooh ko wa da yachem ko wa ki bru wa chah ktah, tangwa yaka Report da yoh ynnin i miet heiwa da chem wa em ko ya u COVID-19.
Da pyntip u leh wa hadooh kattæ, 3 ngut kiwa yoh ya uni u khñiang da em ki ha ki thaw sumaar wei 8 ngut won da em ha ki yung ki sem wow sumaar.
Hawa kylli da pyntip u wa ka chnat i chait i khiah da phah Test ko leh ya ki 9 ngut kiwa yajan wa kani ka manbei kawa dang yoh ya uni u khñiang.
Discussion about this post