Ka All Khasi Meghalaya Tourist Taxi Association (AKMTTA) da sdang ko ya ka yakhih deiwa kdoh lama yong ya ki kari Tourist wa em Number Meghalaya nadooh ynne ka 9 tarik wei daw pteiñ hadooh ka 14 tarik uni u bnai yow pynyoo yei pyrchah yei wym mano ka sorkar hajrong i dawa wow kdoh ya ki kari kamai kiwa na Assam wow psiah laitlan ki cha ki thaw uiñke suwari wa em ha Meghalaya.
U President ka AKMTTA, u Ricaldinus Dohling da ong u wa kani ka yakhih toh yow pynkynmoo ya ka sorkar hajrong i dawa yong ki wei lada ka sorkar ym bna ko hadooh ka 14 tarik, neiliang ka Association daw chim ko da kiwi ki laad yakhih.
Da ong u wa i wym pynrkhiñ ya ki kari Assam kiwa da yoh u kamai laitlan da ktah ko yei ja-kpoh kiwa yah kari Tourist ka Meghalaya wei neiliang ka AKMTTA da dawa ko na ka sorkar wa toh u wanrah noh da ka aiñ wow pynrkhiñ ya ki kari kiwa na baar wow lai laitlan iwa daw yarap ya kiwa yah kari ka jylla.
Hawa kylli wa lada kani ka yakhih daw ktah ya ki kari Meghalaya kiwa lai cha Assam, neiliang u Dohling da ong u wa ini i dawa ym ktah ko ya kiwa yah kari wei ka sorkar toh u sñiawthooh ko wa ka AKMTTA ym em dawa ko wow khang yei wan ki kari Assam cha Meghalaya tangwa i dawa toh wow pynrkhiñ du ya kitu kiwa lai cha ki thaw uiñke suwari.
Discussion about this post