Hadien wa yoh ujor na ki paidbah yei wan kreh ki baar jylla cha ka thaaiñ Upper Shillong wa Mylliem iwa man wym yoo tipsap de kiwa wan neiwon wei da pynhær ryngu yei lai i wan ki tre chnong, kamtæ Khasi Students’ Union Upper Shillong Circle ynnin ka 26 tarik da khynra ko naphang cha ki thaw wa pynkreh da ki kattu katni ki Contractor Khasi wei ha ini i lai khynra wa syndet, ka seiñ da chem ko kamwa 20 ngut ki baar jylla kiwa wan kreh ki wym em ya ki kot ki sla, kiwa wan kreh pyrchah ya ka aiñ wei khlem bood ya ki kyndon aiñ Interstate Migrant Workmen Act.
Ka seiñ da ong ko leh wa da chem wa ki Contractor da wan yah kreh ki da ki baar jylla ki wym pu biang rta iwa man leh pyrchah ya ka aiñ. Kamtæ ka seiñ ha kani ka jooh ka sngi da phah liwan noh ko ya waroh ki baar jylla cha ki thaw wa wan ki.
Ka seiñ ka dap ko dei sñiaw lyngngoh wa katwa ki khynroo Khasi dang kyrdooh kaam ki tangwa kini ki Contractor won da wan yah pathan ki da kini ki baar jylla wei kitæ leh da ki wym biang ki kot ki sla.
Sa chisien ka seiñ da kyntu joor ko ya waroh wa lada ya ki kaam wa dang ye u kreh da ki para doh para snam wow sñiawbha wow e chwa cha ki bru yong i.
