Jowai: Ki le tylli ki seiñbhalang ka HSU, AJSU waka CRJM ynne i step synyaw heipor 2:10 hadien wa da yoh yutip ki wa joor ka chalan tooh ya ki masi cha Bangladesh, neiliang kini ki le seiñ da yoh kem ya kawi ka truck hadien ka laad Demthring kawa kit masi wa suba wow chalan cha Bangladesh.
Hapoh kani ka truck wa em ya u number ML10 A 7251 kawa yah da u tre jylla wei da em leh ar ngut kiwa suba toh ki Muslim wa uwi wa suba toh u Dalal u wym tipmit uwa na Demthring.
Ki seiñ da pyntip ki wa kani ka kari toh kawa mih na Barbeta Assam.
Ya kani ka Truck, da yah ki le seiñ cha Jowai Police Station wei da pyntip ki leh cha u SP tangwa ym yoh phone ki oo.
Hawa kylli won na ki pulit da pyntip ki wa da chem ki ya u tre kini ki masi uwa na Demthring uwa da wanrah ya ki kot ki sla wow pynsakhiat wa dep thied u ya kini ki masi wei dang mut u wow lai booh cha trep masi wa em cha jan ka chnong Pynrthor Langteiñ neidaw wa ka chnong Demthring ym chah de ko wow psan masi hapoh ka chnong kamtæ ki pulit da pyllait ki wow kit noh ya kini ki masi wa em 15 tylli deiwa ong leh toh u booh ki chi thaw kat wym pu dep ka takit.
Neiliang ki le seiñ won da ong ki wa da tikna wa kini ki masi toh kiwa mut u challan cha Bangladesh neidaw waroh 15 tylli toh ki masi chynrang heiwa cha i boon toh pynemkaam da ki masi kynthai hawa dai doh masi wei daw lai ki leh cha u SP heiyatoh wa ini.
Discussion about this post