Jowai : Ki pulit ka Jowai Police Station da pyntip ki wa ha ka miet yong ka 12 Kmaichonglad heipor kamwa 11:42 da yoh yutip ki na kiwa kreh ka Weigh Bridge ha Ynñiawmer wa uwa yah ya ka truck wa em No. AS-01-GC 7853 em ki bru kiwa rah tiar pynmynsoo da tympiah ki ka ka yit ka truck u kawa pynyieñ u harood sarok deiwa thmu wow lute na oo.
Kini ki damok da pynemkaam ki ya ka kari Bolero ka wym em number wei da tympiah ki ya ka yit da u dieñ.
Mar yoh ya ka yutip ki pulit da phah ki ya ka Highway Patrolling Party kawa da lai bran bran cha kani ka thaw kawa da yoo ya kani ka kari wei kini ki damok da yut ki na ini i thaw. Manda sylli ya kani ka Bolero da chem ya le klong ki Petrol Bomb wa uwi u dieñ.
Da yoh yutip leh wa u Subhash Dkhar da ujor u ha ki pulit ka Ladrymbai BH heiwa da ong u wa da chah tooh ka kari Bolero u ha ki damok wym tipmit kawa da pynyieñ u ha yung yong oo wei da suba wa da pynemkam ki damok da ka kari yong oo.
Chooh chooh ha ka 13 tarik da yoh yutip biang ki pulit wa kini ki jooh ki damok heiwa da uiñ ki ha ki thaiñ Ynñiawmer hapoh ar tylli ki kari wei thmu wow lute na ki kari.
Kini ki kari toh ka Maruri Zen wa em u No. ML09 2622 wa ka Taxi wa em No. ML04 7515.
Manda lai ki pulit da yoh ki u ksoh ya kini ki kari wei da kem ya ynru ngut ki bru.
Ya kini ki damok da tip kam u
- Dapmain Shylla na Iooksi
- Berly Suchiang na Tyndowapung
- Daniel Phawa na Ialong
- Amechanki Mannar na Iooksi
- Lakhon Shylla na Sabahmuswang
- Janki Lamare na Mynska
Discussion about this post