Ki pulit ynnin i janmiet da kem ki ya ar ngut ki bru, kiwa emkti wow phah ya ki email deiwa maham pyntieñ wow tympdung bomb kiwa da ong toh kiwa man naka seiñ wa tip kam ka Lawei Ba Phyrnai. Ya kini ki bru, ki pulit da yoh ki wow kem du hapoh ar tayaw heiwa kini da phah email nyngkong ki ha ka 1 tarik uni u bnai deiwa maham nyngkong ya u Montri Rangbah iwa da phah lang cha ki laad pathai khubor wa daw sdang tympdung bomb nadooh wa sdang u Naisan lada ym ye u e kreh ya waroh.
U Montri wa pait ya ka Kaam Pohyung (pulit), u Lahkmen Rymbui da ong u wa ki pulit da booddien bha ki mar ya dep kani ka Lawei Ba Phyrnai u phah ya ki email cha ki laad pathai khubor wow leh ya ki kaam pyntieñ.
Da pyntip u wa hawa ki pulit da pynjoor ki yei thooh wa joor bha da yoh ki wow kem ar ngut ki bru ynnin i janmiet na Shillong wei da kem leh ya ki kattu katni ki tiar wa pynekaam ki. Da pyntip u wa napyrdi kiwa da chah kem toh uwi uwa phah ya ki email, katwa uwi won toh uwa yarap, wei katni ki pulit dang takit bniah ya kitai ki ar ngut yow chem chooh chooh ya kiwi kiwa emkti.
Hawa kylli, u Rymbui da ong wa kini ki bru toh kiwa da stat da tip, tangwa da leh yeini yow pynkulmar ya ki bru tangwa da ong u leh wa iyi i thmu yong kini ki cha kylla won dang pynman ya ka takit.
